ArcelorMittal, në performancë rekord / Gjiganti i çelikut raporton nisjen më të mirë të vitit në 1 dekadë
Prodhuesi më i madh në botë i çelikut, ArcelorMittal, raportoi të ardhura më të mëdha se ç’pritej në tremujorin e parë, që e quajti edhe tremujorin më të fortë në 1 dekadë. Kompania theksoi se pret që kërkesa botërore e çelikut të rritet me 4.5% deri në 5.5% këtë vit, prej rritjes së shfrytëzimit të kapacitetit dhe inventarëve të ulëta. Përjashtuar Kinën, kjo rritje pritet në 8.5% deri në 9.5%, me një rimëkëmbje të fortë në Indi. Kompania me seli në Luksemburg raportoi një fitim përpara taksimit, interesit, amortizimit dhe zhvlerësimit në 3.24 miliardë dollarë, më shumë se 3 herë më i lartë nga e njëjta periudhë një vit më parë. “Tremujori i parë i këtij viti ka qenë më i forti në një dekadë”- tha Aditya Mittal, ekzekutivi i kompanisë dhe djali i themeluesit, Lakshmi Mittal. Grupi theksoi se ka përfituar nga rimëkëmbja më e fortë e kërkesës së çelikut, nxitur nga industria e makinave, çka ka sjellë dërgesa më të mëdha.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.