‘Argjendi në periudhë të artë’ – Kap vlerën e tij më të lartë që nga mesi i gushtit
Çmimet e argjendit arritën në një lartësi pesë-mujore të hënën nën thirrjet e mediave sociale për të blerë metalin dhe për të imituar valën që rriti aksionet e GameStop. Aksionet në një pjesë të firmave minerare më të vogla australiane u rritën ndërsa tregtarët e vegjël blinin në masë.
Argent Minerals, Boab Metals dhe Investigator Resources u rritën më shumë se 15%. Uebfaqet e shitjes së monedhave raportuan gjithashtu kërkesa të pashembullta dhe vonesa të konsiderueshme në dorëzimin e argjendit.
Argjendi u rrit deri në 7% në 28,99 dollarë për ons, vlera e tij më e lartë që nga mesi i gushtit. Lëvizjet janë shembulli i fundit i tregtarëve të vegjël që blejnë aksione dhe asete të tjera të cilat fondet e mëdha të Wall Street nuk i parapëlqejnë duke rezultuar kështu për pasojë me humbje të mëdha për investitorët kryesorë.
Disa përdorues në forumin Reddit Wallstreetbets argumentuan se argjendi është një treg i manipuluar shumë dhe një rritje e çmimit të argjendit mund të dëmtojë lojtarët e mëdhenj të Wall Street. “Mendoni për Gainz. Nëse nuk kujdeseni për fitimet, mendoni për bankat si JP MORGAN që do të shkatërronit gjatë rrugës,” tha përdoruesi i Reddit RocketBoomGo, në një postim të shpërndarë gjerësisht.
Rritja e fundit e GameStop, e cila u nxit edhe nga investitorët me pakicë, u pa gjithashtu si një revoltë kundër investitorëve të mëdhenj institucionalë. Ndryshe nga GameStop, i cili ishte një shitës deficitar i lojërave me pakicë, për të cilin shumë fonde investimesh kishin vënë bast, Argjendi ka parë një rritje të fortë gjatë vitit të kaluar.
“Ekziston kjo situatë kurioze tani ku turma Reddit i ka kthyer sytë drejt një balene më të madhe në një përpjekje për të katalizuar diçka me presion të shkurtër në tregun e argjendit,” tha Kyle Rodda, një analist në brokerimin IG Markets në Melburn. “Ka shumë komente mbi këto platforma për minatorët.”
Çmimet e argjendit janë rritur 15% që nga mbyllja e së mërkurës, pikërisht gjatë kohës kur mesazhet filluan të qarkullojnë në forume të tilla si Reddit për të inkurajuar përdoruesit të blejnë metalin dhe të ngrenë çmimet. (BBC)
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.