Argjentina drejt krizës së radhës – Peso ka humbur 45.3% në 2018-ën, FMN vlerëson kërkesën për ndihmë
Fondi Monetar Ndërkombëtar po vlerëson kërkesën e Argjentinës për të përshpejtuar disbursimin e një programi të ndihmës prej 50 miliardë dollarë. Humbja e besimit të investitorëve te qeveria e presidentit Mauricio Macri, ka bërë që peso të bie me më shumë se 7% brenda një dite.
Kjo ishte rënia më e madhe ditore e valutës së Argjentinës që prej adaptimit të regjimit të kursit të lirë të këmbimit në Dhjetor 2015. Valuta u mbyll në një nivel rekord të ulët prej 34.1 kundër dollarit ditën e djeshme, dhe ka humbur 45.3% deri më tani për vitin, gjë që ka sjellë ndërhyrje të shpeshta nga Banka Qendrore.
Rënia e pesos ka sjellë rritjen e inflacionit, që arriti në 31.2% në Korrik. Kjo bëri që Banka Qendrore të rrisë normën bazë të interesit në 45% dhe të shesë më shumë se 13 miliardë dollarë në rezerva.
Investitorët janë përqendruar te ekonomia e 3 më e madhe e Amerikës Latine, ndërkohë që është përballur me një krizë financiare në çdo dekadë. Kriza e fundit erdhi në vitin 2002 nga dështimi i pagesave të borxhit, gjë që çoi miliona banorë të shtresës së mesme në varfëri.
Rënia e valutës bëri që Argjentina t’i drejtohet FMN për ndihmë, nëpërmjet një linje të kreditit prej 50 miliardë dollarë. Brenda kësaj marrëveshjeje, Qeveria e Argjentinës ka premtuar të reduktojë deficitin fiskal.
Megjithatë, zhvlerësimi i madh i pesos ka shtrenjtuar borxhin e denominuar në dollar për vendin dhe investitorët argumentojnë se ndihma e Fondit Monetar Ndërkombëtar nuk do të jetë e mjaftueshme.
“Kemi rënë në dakordësi me Fondin Monetar Ndërkombëtar që të përshpejtojmë të gjitha fondet e nevojshme. Në javën e kaluar, kemi parë humbje të besimit në tregje, veçanërisht mbi kapacitetet tona të financimit për vitin 2019”, tha presidenti. Argjentina duhet të ndërmarrë pagesa të borxhit prej 24.9 miliardë dollarë në peso dhe valutë të huaj vitin që vjen.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.