Argjentina “ngrin” çmimet – Kërkon t’i shpëtojë inflacionit të lartë, premton vazhdimin e reformave
Politikanët në Argjentinë kanë mbrojtur masat e kontrollit të çmimeve në nisje të javës, duke thënë se nuk do të dëmtojnë programin e reformave ekonomike.
Ekonomistët kishin kritikuar se këto lëvizje bien ndesh me përpjekjet e presidentit Mauricio Macri për zhvillimin e një tregu të lirë. Argjentina, e goditur nga recesioni, ‘ngriu’ çmimet e produkteve bazë ushqimore dhe shërbimeve publike, në përpjekje për të fituar mbështetjen e konsumatorëve përpara zgjedhjeve kombëtare në muajin Tetor. Sipas sondazheve, Macri do të përballet me një sfidë të madhe. Ministri i Prodhimit dhe punës, Dante Sica, mbrojti masat e prezantuara në një konferencë
“Këto masa synojnë të lehtësojnë dhe përmirësojnë fuqinë blerëse dhe janë plotësuese e jo dëmtuese të programit të reformave strukturore në afat-mesëm.” – tha Dante Sica.
Ekonomistët thonë se kontrolli i çmimeve nuk do të ketë efekt të madh ndaj inflacionit gjigant që rritet me një normë vjetore prej 50%. Përkundrazi, këto lëvizje shihen si populite. Mauricio Macri, që arriti një marrëveshje prej 56.3 miliardë dollarë me Fondin Monetar Ndërkombëtar vitin e kaluar për të ndihmuar ekonominë e tretë më të madhe të Amerikës Latine, ka premtuar se do të reduktojë ndërhyrjen e Qeverisë te tregjet dhe bizneset.
Qeveria publikoi paralelisht disa rregullime që shtojnë mbikëqyrjen e sjelljes së korporatave, për të siguruar transparencën dhe besnikërinë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.