“Argument” – Anastas Angjeli: “Shqipëria do të fokusohet në energjinë e gjelbërt dhe dixhitalizimin për ristrukturimin e ekonomisë”
I ftuar në emisionin “Argument” me gazetarin Enio Civici mbrëmjen e sotme ishte profesori I ekonomisë dhe deputeti i Partisë Socialiste, Anastas Angjeli, i cili ka folur mbi perspektivën e zhvillimit ekonomik të Shqipërisë, sipas draftit të projektuar edhe për Buxhetin e vitit 2021, I cili ka hyrë tashmë në fazën e konsultimeve.
Një mbyllje tjetër do të ishte katastrofale është shprehur z.Angjeli përsa i përket pandemisë së COVID-19. Sipas tij qeveria duhet të qëndrojë vigjilentë për të stimuluar ekonominë me mekanizma të ndryshme:
“Gjendja e financave publike është përkeqësuar dhe u dobësuan gjithashtu të ardhurat në Buxhet. Parashikimi mbi vitin e ardhshëm bëhet në bazë të rezultatit të këtij viti por edhe duke parë situatën e pandemisë. Disa shtete i kanë shtuar masat në këtë periudhë të pandemisë, ndërkohë tek ne nuk pritet kjo dhe parashikojmë se do të ketë ketë kufizime të vogla.
Do të ishte fatkeqësi ose dramatike nëse për shkaqe që nuk varen nga ne do përfundojmë në një mbyllje tjetër. Duhet të jemi të vëmendshëm që nga Garancia Sorane e kredisë deri te stimuluesit fiskale dhe falja e detyrimeve të prapambetura për t’i dhënë stimule ekonomisë.
Sa i përket Buxhetit të vitit 2021 ne nuk kemi hapur projekte të reja në investime, por kemi vijuar ato që ishin planifikuar dhe që mund t’i japin shtysë ekonomisë në instrastrukturë dhe energji.
Sipas z.Angjeli fokusi i Buxhetit do të interesohet edhe në dy drejtime shumë kryesore sipas tij që do t’i japin një përparësi Shqipërisë në rrugën e saj drejt rimëkëmbjes ekonomike:
“Investimi në ekonominë e gjelbërt dhe investimi në dixhitalizimin e ekonomisë. Këto do të ndihmojnë politikën ekonomike dhe ristrukturimin e saj, si edhe në ristrukturimet e vetë bizneseve.
Ekonomia e gjelbërt është edhe në transport, turizëm dhe degë të tjera. Në këtë këndvështrim ne jemi në përputhje me mundësitë tona që kemi për të investuar në ekonominë e gjelbërt. Ajo që do thoja tjetër është se bujqësia, që është kriza e këtij viti së bashku me eksportin, ne duhet t’I thërrasim mendjes që përderisa ky sektor edhe I goditur ka arritur të mbijetojë, ne duhet të investojmë pasi do të ndihmojë ekonominë shqiptare.
Duhet ta shikojmë gjithashtu më me kujdes, çështjen që ka të bëjë me përballimin e situatave të jashtëzakonshme.
Drejtimi tjetër është financimi i teknologjisë dhe dixhitalizimit. Në këtë drejtim qeveria ka bërë avancim të suksesshëm. Janë shumë shërbime që 3-4 vjet më përpara kishin radhë të tëra për qytetarët dhe nuk shmangej as korrupsioni, ndërsa tani me dixhitalizimin gjithçka është lehtësuar.
Në fushën e tregtisë, shërbimeve dhe punës nga shtëpia duhet që teknologjia t’i përgjigjet zhvillimit dhe që t’i përgjigjesh duhet të përfshijë investimin e duhur.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.