“Argument” – Bizneset nuk aplikojnë për ndihmën, ministrja Denaj: “Do bëhet kalimi automatik deri në 5 qershor. Shtojmë përfituesit”
Në emisionin “Argument” e ftuar ishte ministrja Anila Denaj për të folur mbi reagimin e qeverisë për situatën e COVID-19.
Gazetari Civici është ndalur për të pyetur ministren edhe mbi vështirësitë që po hasin individët për të përfituar ndihmën nga paketa e dytë financiare dhe masat e reja të prezantuara nga qeveria për kalimin automatik të pagës.
Ministrja njoftoi se do të ketë edhe një shtesë të individëve përfitues, që do bëhet publik ditët në vazhdim:
“Për të trajtuar këtë problem unë mendoj se duhet të flasim në kontekst statistikash. Në paketën e parë kemi një numër përfituesish që arrinin deri tek 62 mijë e 400 persona. Ndërkohë kur filluan aplikimet për paketën e dytë erdhi dyfishi i tyre.
Ndërkohë pagesën e parë dhe të dytë e kanë marrë në total 64 mijë e 964 persona. Pra, individë që kanë përfituar nga të dyja paketat.
Më pas kalojmë tek paketa e dytë ku kanë përfituar në total 110 mijë persona nga 176 mijë që është objektivi ynë. Tek paketa e dytë kemi pasur vështirësi proceduriale. Ne vumë re se shumë biznese kishin probleme me pjesën e deklarimit të punonjësve. Në këtë mënyrë kemi marrë disa masa, ku e para kemi shtyrë shtyrë afatin për aplikimin dhe e dyta do të shtojmë përfituesit me një grup tjetër që do të komunikohet nesër. ”
Por, një pyetje e ngritur këto kohë është edhe paralajmërimi i qeverisë për bizneset që nuk aplikojnë për ndihmën dhe arsyes për një veprim të tillë. Ministrja është shprehur se për këtë shkak do vihet në përdorim kalimi automatik i pagave:
“Obligimi ynë është që paga prej 40 mijë lekësh të shkojë tek individi që është shpallur përfitues. Kjo duhet të ndodhi brenda një afati që për ne është 5 qershori. Të gjitha palët duhet të angazhohen që kjo të përfitohet. Nëse bizneset edhe pas penaliteteve nuk reagojnë, ne kemi ndryshuar procesin që ato të shkojnë automatikisht. Kjo është vendimmarrje nga Këshilli i Ministrave. Deri në datën 5 qershor ne duam të paguajmë të gjithë përfituesit edhe ata të rinjtë që do shtohen nga nesër.
Ky është ndryshimi i fundit që morëm si iniciativë në Këshill Ministrash dhe është në proces zbardhje.”
G.K/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.