“Argument” – Dekani Artan Hoxha jep vlerësimin për Reformën në Drejtësi dhe shpjegon sfidat e së ardhmes

Në një intervistë ekskluzive për emisionin “Argument”, dekani i Fakulteti të Drejtësisë, z.Artan Hoxha, si ekspert i çështjes është shprehur nga ana juridike për formësimin dhe vazhdimësinë e procesit për Reformën e Re në drejtësi.

Pyetur se në cilën fazë ndodhemi në këtë proces dekani është shprehur:

“Reforma në Drejtësi është bazuar mbi ndryshimet Kushtetuese në vitin 2016, të cilat riorganizojnë Sistemin e Drejtësisë nga themelet e tyre. Një prej këtyre ndryshimeve ishte edhe krijimi i SPAK, strukturë e Posaçme e cila duke filluar nga nesër merr kompetenca nga Kushtetuta për të hetuar dhe ushtruar ndjekjen penale kundër zyrtarëve të lartë apo veprave penale të rënda. Në këtë moment jemi në fazën thelbësore të Reformës pasi janë krijuar organet themelore. Sot, është një moment i rëndësishëm dhe për tu përshëndetur, pasi prej strukturës dhe Gjykatës së posaçme do hetohen çështje që janë gangrenë e shoqërisë shqiptare si korrupsioni dhe krimi i organizuar.”

Më tej ai është pyetur rreth vlerësimit që ka për tërësinë e Reformës dhe se sa do t’i shërbejë ajo shoqërisë shqiptare:

“Është një moment historik për Shqipërinë. Ne e dimë se besimi në drejtësi kishte rënë dhe kishte elementë të theksuar të sjelljes jo-etike, korruptive në trajtimin e çështjeve dhe kështu lindi nevoja për reformimin e procesit gjyqësor dhe prokurorisë.

Me këtë reformë bëhet e mundur që të gjitha veprat penale në përgjithësi do të kenë garantin, që ti do përgjigjesh për ato që bën dhe nuk do të ketë autoritet, individë apo persona që do të tejkalojnë sundimin e ligjit. Kështu që, nëpërmjet reformës është vlerësuar për tu reformuar e gjithë shoqëria shqiptare. Bëhet i mundur përmirësimi i jetës në përgjithësi dhe funksionimi normal i sistemit ligjor.”

Z.Hoxha nuk ka lënë pa përmendur edhe faktin se puna ende vazhdon për plotësimin e të gjithë organizmave kryesore të Reformës:

“Ka ende sfida në krijimin e organizmave të tjerë si Byroja Kombëtare e Hetimit, një strukture hetimore që e ndihmon SPAK në hetimin e çështjeve dhe është një nga sfidat e para e kësaj strukture për funksionimin normal të saj. Nga ana tjetër nuk kemi krijuar ende Inspektorin e Lartë të Drejtësisë, një nga funksionet më të rëndësishme që ka Reforma për disiplinimin e prokurorëve dhe gjyqtarëve.

Kemi gjithashtu edhe një numër mjaft të lartë gjykatash që nuk munden të funksionojnë për shkak të mungesave në gjyqtarë, por ka edhe nga ato të cilat nuk janë më të nevojshme, prandaj duhet bërë riorganizimi i gjykatave dhe ndarja e përgjegjësive të tyre.”

Në përfundim dekani u shpreh se në këtë fazë po punohet ende intensivisht për të bërë të mundur të plotësohet i gjithë kuorumi i nevojshëm për organizimin e drejtësisë, qeverisjen dhe vetë-qeverisjen e saj.

Geri Kolgega / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.