‘Argument’ – Deputeti Angjeli: “Amnistia fiskale do të jetë e plotë. Këto janë kategoritë që përjashtohen”

Në emisionin e mbrëmjes së sotme “Argument” nga gazetari Enio Civici është diskutuar mbi masat e fundit të shpallura nga qeveria si detajet për paketën e dytë financiare dhe amnistia fiskale, një nisëm që ka ngjallur debate të forta.

I ftuar për të diskutuar rreth kësaj teme ishte ish-ministri i Financave dhe deputeti i Partisë Socialiste Anastas Angjeli.

Sipas tij, kjo nisëm ka qenë me kohë në planet e qeverisë dhe se ka ardhur moment I duhur për të vënë në process hartimin e saj:

“Unë besoj se po të kthehemi dy muaj mbrapa, kujtoheni se ky debat filloi pasi kryeministri hodhi idenë për të bërë një amnisti fiskale. Pra, nuk ishte e planifikuar në kohën e pandemisë, por ishte ne axhendën e qeverisë. Amnistia fiskale në një moment situate të caktuar, na favorizon të gjithëve. Normalisht u mor koha e nevojshme për tu përgatitur kuadri ligjor dhe koincidoi me kohën e koronavirusit.”

Më tej deputeti Angjeli u fut më në detaje, duek treguar kategoritë e mundshme që do të përjashtohen nga amnistia dhe ato të cilat përfitojnë më shumë prej saj:

“Është vështirë të japësh rekomandime. Nga çfarë është diskutuar nga përvojat e vendeve të tjera apo të amnistive të pjesshme që janë bërë në vendin tonë, duket se kjo amnisti ka si subjekt një diapozon të gjerë me tre përjashtime, ku përfshihen ata elementë që figurojnë të inkriminuar, pastaj pjesa tjetër funksionarë ose ish-funksionarë në administratën e lartë dhe natyrisht personat në politikë. Kur akti ligjor të dali, objektet e amnistisë do të jenë shumë të qarta, ndërsa kjo është faza kur duhet të zhvillohen debati të gjera. Faktorët e interest janë ata që duhet të propozojnë ide për këtë situatë. ”

Lidhur me dobishmërinë e amnistisë, deputeti Angjeli u shpreh se është nëj instrument që favorizon ekonominë shqiptare në një moment të vështirë:

“E para është plotësimi i kërkesës së tregut. Tregu ka nevojë për likuiditet, ekonomia ka nevojë për investime. Buxheti i shtetit ka nevojë për para, por ata që kanë nga ana tjetër interes janë individët dhe subjektet e biznesit, që do t’i nënshtrohen nismës së këtij ligji, pasi janë ata që do t’i ofrojnë këto para, pra nga jashtë qarkullimit bankar, tani kanë një shanc që ato para t’i fusin në kanalet e qarkullimit nëpërmjet bankave. ”

Pyetur nga gazetari Civici se pse amnistia e plotë fiskale nuk është bërë kurrë e mundur më parë, deputeti Angjeli është përgjigjur se:

“Nga përvoja e vendeve të tjera amnistitë nuk i kanë arritur pritshmëritë e tyre, si nga shuma e parave që mendohet të mblidhen dhe të kanalizohen, ashtu edhe nga dimensionet e saj. E para, ka rëndësi besimi mes individëve dhe bizneseve. Duhet që amnistia t’i vërë në mënyrë të barabartë përpara këtij ligji. Së dyti, duke shfrytëzuar këtë moment kur financat publike dhe ekonomia shqiptarë kanë pësuar dy goditje të forta, duket se sa më e gjerë të jetë përfshirja e subjekteve në këtë ligj aq më mirë do të jetë për ekonominë.”

Anastas Angjeli bëri thirrje edhe për forcat politike, që ligjin tat ë mos kundërshtojnë pa argumente të forta:

“Amnistitë kërkojnë mbështetje sa më të gjerë. Të gjtihë do preferonim të kishim konsensus sa më të gjerë, por unë do të thoja që asnjë forcë nuk duhet të shndërrohet në pengesë për këtë ligj, nëse nuk ka mendime të argumentuara fort.”

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.