“Argument” – Funksionimi i SPAK, Pëllumbi: “Ka mbështetjen e Amerikës dhe BE-së, do të kthejë besimin tek drejtësia”

Struktura e Posaçme Anti Korrupsion apo SPAK ka qenë padyshim një nga çështjet më të nxehta, që ka shoqëruar opinionin publik gjatë 2019-ës, kur pas dy vitesh u bë i mundur edhe funksionimi i tij.

Si një nga organet e Reformës në Drejtësi që pritet të marrë masa të forta ndaj hetimit të korrupsionit dhe krimit të organizuar, qytetarët shqiptarë presin rezultate konkrete nga puna e tij.

Moderatori Civici i ka drejtuar pyetjen e drejtpërdrejtë deputetit të Partisë Socialiste, z.Arben Pëllumbi nëse a ka besim se ky organ do të prodhojë rezultatet kaq të shumëpritura:

“Pritshmëria e të gjithë neve bashkë me mua, që në këtë rast dua të komentoj si qytetar dhe jo si politikan është se SPAK-u dhe të gjithë elementët e tjerë që e shoqërojnë  si BKH-ja dhe Gjykata e Posaçme të mund të jenë më të vendosur dhe më të lirë për ushtrimin e veprimtarive të tyre. SPAK-ut i është dhënë mbështetje e fortë nga partneri ynë, Amerika por edhe nga Bashkimi Europian, duke treguar se iniciativa që ky organ të funksionojë është goxha e mirë. Pra, besoj në këndvështrimin tim se kjo mbështetje kaq e fortë, jo vetëm morale, por edhe financiare nuk do të jetë e padobishme dhe se do të japë rezultate për qytetarët shqiptarë.

Besoj se një nga detyrat kryesore që SPAK-u mban mbi shpatulla është të kthejë besimin tek sistemi i drejtësisë, si e vetmja mundësi që na dërgon drejt rrugës europiane. SPAK-u tashmë e ka filluar rrugën e saj. Politika aq sa ka pasur mundësi të ndihmojë apo të pengojë e ka bërë të vetën, duke ndikuar në të dyja format.

Por, sistemi i drejtësisë ka filluar të punojë në formë të plotë dhe shpresojmë që në këtë mënyrë do të ketë rezultate dhe do të arrihet objektivi përfundimtar, i cili është kthimi i besimit tek sistemi i drejtësisë.”

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.