“Argument” – Kryeministri premton 420 euro rrogë minimale për punonjësit e Rindërtimit, çfarë ndikimi do të ketë

Në të njëjtën linjë me Rindërtimin dhe projektet e mëdha që janë shpallur nga qeveria ku pritet të marrin pjesë edhe kompani të huaja, një aspekt tjetër mjaft i rëndësishëm i këtij procesi është fakti se sa do të jetë rroga minimale e punëtorëve, që do të merren me ndërtim.

Kryeministri ka premtuar se më minimalja do të jetë në sasinë 420 euro, që shihet si e kënaqshme në krahasim me ligjin aktual të pagës minimale në rreth 220 euro.

Një diskutim tjetër që procesi i Rindërtimit ngriti ishte se Shqipëria ka nevojë për forcë punëtorë të huaj, gjë e cila rezultoi edhe në miratimin e një ligji për t’i dhënë lehtësira emigrantëve të punojnë në vendin tonë.

Genti Beqiri në fjalën e tij u shpreh se është e vështirë t’i detyrosh kompanitë kur vjen puna tek vendosja e pagave:

“Firma pasi merr tenderin ka nevojë për fuqi punëtore jashtë kufijve të vetë ndërmarrjes. Kjo është ekonomi tregu me kërkesë dhe ofertë. Teknikisht është e vështirë që të detyrosh një kompani që ata se do të punësosh ti marrësh me një rrogë të tillë, ndërsa ne po përcaktojmë disa nga kostot kryesore, kur nga krahu tjetër duam punë cilësore.

Është e vështirë mënyra se si mund ta detyrosh një firmë, nëpërmjet ligjit të pagës minimale apo mekanizmave të tjerë, kjo është ende e panjohur.”

Pajtim Melani tha se shqiptarët duhet ta pranojnë forcën e huaj punëtore dhe se shtimi i punësimit në çdo rast rrit ekonominë:

Për tu kthyer te termat e referencës. Kur Kompanitë që do konkurojnë të bëjnë koston e pagave që është një nga elementët kryesorë dhe aty do të vendoset një dysheme që do të imponohet, nëse kompanitë janë të huaja apo vendase një pjesë e pagave i mbetet ekonomisë shqiptare. Punësimi është një nga sfidat kryesore reale të ekonomisë. Shtimi i punësimit rrit ekonominë, pasi është një veprim shkak-pasojë.  

Ne si shqiptarë duhet ta heqim pjesën e racizmit, pasi e kemi vuajtur mbi supe pjesën e emigrimit. Puna është si çdo faktor tjetër prodhimi, në qoftë se do të konkurrosh në një treg të lirë liria e lëvizjes së punonjësve është një nga sfidat kryesore. Përvec lirisë së njerëzve dhe kapitalit lëvizja e forcës punëtore është një nga objektivat që kërkon edhe integrimi në Bashkimin Europian. Ne kemi papunësi jo shumë të lartë sipas shifrave zyrtare, besoj që për pjesën e punonjësve të lidhur me ndërtimin dhe pa kualifikime të tjera, ky do të ishte një shanc shumë i mirë.  

Mark Crawford mendon se qeveria shqiptare duhet të mendojë për politika më të mira me rrogën minimale që të bëhet e konkurueshme me vendet e tjera:

Duhet një rrogë e kënaqshme që njerëzit të kthehen nga vendet ku punojnë. Shqipëria ka goxha forcë punëtore në vende të huaja dhe tregu i lirë duhet të ofrojë një pagë të kënaqshme që konkuron vendet ku shqiptarët aktualisht punojnë. Duhet të tërheqin diasporën të vijnë prapë këtu.

Ndërkohë, Klodian Muço mendon se paga dysheme nuk është një zgjidhje shumë praktike në Shqipëri:

“Sipërmarrësit shqiptarë kanë treguar ndër vite që mund të deklarojnë një tjetër pagë dhe në dorë të japin diçka tjetër, prandaj rregullimi ndërmjet pagës dysheme nuk është një zgjidhje shumë praktike. Kam përshtypjen se nuk është shumë atraktive Shqipëria për punëtorët e pakualifikuar. Ne kemi nevojë për njerëz për forcë puëntore të kualifikuar. Një emigrant i pakulifikuar e ka shumë më të thjeshtë të shkojë në një vend tjetër për të punuar dhe për të fituar më shumë.”

Geri Kolgega / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.