“Argument”/ PD dhe PS propozojnë të dyja pagë minimale 30 mijë lekë. Por propozimet kanë një ndryshim

Në emisionin”Argument” të gazetarit Enio Civici u diskutua për programet ekonomike që kanë paraqitur subjektet politike, edhe në kontekstin  e alternativave për rimëkëmbjen e ekonomisë pas goditjes që ka kmarrë nga pandemia.

Një nga pikat e rëndësishme që gjendet në programet e dy subjekteve kryesore politike është rritja e pagës minimale. Si qeveria, ashtu edhe opozita propozojnë që paga minimale të bëhet 30 mijë lekë.

“Të gjithë e dijmë që ka të bëjë me informalitetin. Kjo që quhet pagë minimale nuk është se është vertët pagë minimale në bizneset shqiptare. Ne po bëjmë formalizimin. Ne kërkojmë që të deklarohet ajo që paguhet. E domosdoshmja është bërë urgjente. Unë nuk mendoj se është shqetësim direkt i bizneseve të stabilizuara. Sot në Shqipëri më shumë problem kemi mungesën e kapaciteteve njerezore apo kapitalit njerëzor” tha Ervin Bushati i PS-së.

Të njëjtin qendrim mbështeti edhe Alban Zusi si përfaqësues i biznesit, ku pranoi se bizneset e konsoliduara paguajnë paga më të larta se ajo që është aktualisht pagë minimale.

Sipas Zusit, në vitet e mëparshme biznesi ka qenë kundër sepse nuk ishte momenti por tashmë ka ardhur koha sepse bizneset po konkurrojnë mes tyre për fuqi punëtore dhe si rrjedhojë po paguajnë më shumë në mënyrë që të tërheqin punonjës.

Po ku ndryshon propozimi i qeverisë që do të konkretizohet në janarin e vitit të ardhshëm nga propozimi programor i opozitës?

Mato Spaho shpjegoi se qeveria po e kthen këtë rritje të pagës minimale si një barrë për biznesin pasi ky hap nuk shoqërohet nga një politikë fiskale lehtësuese.

“Ka një diferencë thelbësore. Cështja është si do të arrijmë te kjo pagë. Pas një situatë Covid, bizneset kanë mbyllur dyert. Për të paguar pagat janë detyruar të marrin kredi e kjo vjen si një gjobë tjetër.

Të dyja janë 30 mijë klekë por në rastin e propozimit të qeverisë nuk është asgjë tjetër, veçse imponim e një taksë shtesë për biznesin që nuk dihet a do ja dalë mbanë.

Në rastin e PD, propozohet që shteti të ulë barrën mbi biznesin, të taksave  e barrën burokratike dhe më pas të rritet paga minimale. Janë më shumë se 30 përqind e te punësuarve që deklarojnë pagë minimale aktualisht” tha Spaho.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.