“Argument” – Plani Kombëtar i Ringritjes, ministrja Denaj: “Do ndërmarrim reforma të rëndësishme. 2020 paraqitet pesimiste”

Në emisionin “Argument”, ministrja Anila Denaj përballë gazetarit Enio Civici ka folur mbi parashikimet që e presin rritjen ekonomike të vitit 2020, por edhe për atë që kryeministri e quajti “Plani Kombëtar i Ringritjes”.

“Shifra zyrtare të deficitit buxhetor janë ato të aprovuara në parlament që e çon atë në 3.9% dhe mendojmë se me rezultatin e të ardhurave të 4 mujorit kjo duhet të rishikohet. Ne menduam se qershori është muaji i duhur për diçka të tillë.

Normalisht do të ketë një zerim, por se sa e kam të vështirë të jem precise. Kemi synuar të jemi konservatorë dhe të marrim parasysh tregun e punës në parashikimet tona pesimiste. Duhet të shohim edhe rezultatet e muajit maj, për të parë skenarin se sa pesimist mund të jetë ky vit.

Gjithashtu duhen parë edhe ndikimet nga shtyrja e afatit të aplikimit të lehtësisë që aprovuam në muajin dhjetor në parlament për rivlerësimin e pasurisë që kishte një afat të caktuar kohe dhe është shtyrë deri më 4 dhjetor. Të gjitha këto do t’i rivlerësojmë në fund të qershorit.”

Ndërsa, për Planin Kombëtar të Ringritjes, ministrja tha se do ndërmerren reforma të rëndësishme:

“Kryeministri që në fillim të vitit ka lançuar një program 5 vjeçar reformash ekonomike. Kjo ka nisur edhe përpara pandemisë. Ne kemi nisur një plan rishikimi për të përfshirë edhe  krizën e COVID-19. Kjo vjen edhe nga rezultatet nga një konferencë donatorësh shumë e mirë. Të gjitha këto duhet të materializohen në plane konkrete

Kemi edhe disa reforma në aspektin fiskal, si ajo e strategjisë afatmesme të të ardhurave që është punuar në parim edhe me FMN-në. Ka dy objektiva të qarta. Së pari, kalimin e rishikimit të paketave fiskale çdo 3-5 vjet. Së dyti të shikojmë disa elemente të politikave fiskalë, që shkojnë drejt analizës së plotë të tyre dhe për t’i dhënë më shumë kohë gjërave që duhen ndryshuar.

E fundit është reforma e administrimit fiskal. Kjo reformë nuk nënkupton në mënyrë të drejtpërdrejtë një rritje të tatimit. Rishikimi i disa lehtësirave nuk nënkupton këtë, por shikon se si këto lehtësira kanë ndikuar.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.