“Argument” – Rritje stratosferike e çmimit të maskave mbrojtëse, na mbrojnë apo jo nga Koronavirusi?

Në emisionin e sotëm “Argument” po flitet për koronavirusin. Një problem që ka nxjerr në pah ky virus i ri është edhe kërkesa e lartë për maska mbrojtëse dhe dezinfektues, gjë që ka sjellë në mënyrë të pakontrolluar rritjen stratosferike të çmimeve.

Gazetarja Ola Mitre që ka vëzhguar në terren situatën ka shpjeguar se çfarë po ndodh me këtë fenomen:

“Në Tiranë më ka bërë përshtypje një panik i shtuar tek qytetarët, sidomos tek farmacitë, ku nuk gjendej një qytetar që nuk blinte maska mbrojtëse apo dezinfektues. Të gjithë nuk dinin në thelb çfarë maskash të kërkonin, pasi detajet janë më të specializuara dhe ka një shumëllojshmëri të tyre. Ka maska që nuk ofrojnë aspak mbrojtëse dhe shpesherë ne bëjmë blerje të gabuara. Kishte një tendencë nga farmacistët për të mos folur për mediat, duke parë edhe rritjen e madhe të kërkesës për këto. Me rritjen e kërkesës, sigurisht u rritën edhe çmimet në shifra të larta. Gjithashtu në shumë farmaci ka filluar të ketë mungesë për maska, gjë e cila sjell në pikëpyetje se çfarë po bën shteti.”

“Gjatë reportazhit në terren pata mundësinë të pyesja ministren Manastirliu për këtë mungesë në depo të maskave, dhe ministrja më dha përgjigjen se është një treg privat ku nuk mund të ndërhyhet, por depot janë të furnizuara. Ajo që është e diskutueshme në fakt është se OBSH-ja, në sqarimet e saj ka shpjeguar se maska nuk është  një masë thelbësore mbrojtëse. Dezifenktanti dhe higjiena e duarve është rekomanduar më së shumti në masë.

Një tjetër fenomen që kam vënë re për maskat është se ndoshta ka një mungesë informacioni dhe koordinimi, pasi në faqen e ISHP-së për masat e koronavirusit thuhet mund të bëhet edhe  transmetimi nga njeriu tek njeriu i koronavirusit dhe rekomandohet vendosja e maskës. Ka një mos-koordinim informacioni që i bëhet qytetarëve, pasi nga krahu tjetër nuk kërkohet vendosja e saj. Pra, ose ISHP të vendosë që nuk është e rekomandueshme ose të mos e nxjerrë si njoftim.”

Për këtë ka reaguar edhe e ftuara në panel, Arieta Beruka, zyrtare e ISHP-së:

“Maska dueht të përdoret kur në një shtet ka raste të konfirmuara. Në Shqipëri nuk kemi ende një rast të tillë. Dihet se ky virus shpërndahet nëpërmjet sekrecioneve dhe nëse ne do kishim rast të konfirmuar, atëherë padyshim atëherë maska ka vlerë.”

Geri Kolgega / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.