“Argument” – Shoqata e Bareve, Klubeve dhe Restoranteve propozon kërkesat ndaj qeverisë: “Situata është absurde, kërkojmë zgjidhje”

Në mbrëmjen e sotme të emisionit “Argument” nga gazetari Enio Civici ishte i ftuar Enri Jahaj, përfaqësues i Shoqatës së Bareve, Clubeve dhe Restoranteve.

Diskutimi u fokusua në një nga industritë më të rëndësishme në vendin tonë, që është dhe ndër më të goditurat nga kriza e Covid-19 dhe që përfshihet në fashën e fundit të kategorisë së bizneseve që do të hapen prej masave të qeverisë.

Sipas Z.Jahaj Shoqata është themeluar për të krijuar një zë më të organizuar ndaj instancave shtetërore dhe për të ofruar zgjidhje:

“Shoqata për momentin nuk është shumë e madhe. Në momentin që flasim jemi rreth 50 subjekte, ndërsa parashikimi është që brenda një muaji të mbyllim pikat e Tiranës dhe më pas brenda dy muajve  gjithë Shqipërinë që mund të shkojë në rreth 14 mijë biznese.

Kemi qenë disi të ndarë me bizneset tona vetjake në punët e përditshme, ndërsa tashmë ka ardhur momenti për tu bërë të gjtihë bashkë, që zëri jonë të bëhet më i fortë ndaj instancave shtetërore.

Sa i përket situatës ku ndodhen bizneset e kësaj kategori, Z.Jahaj tha se gjendja është shumë alarmante:

Kemi reth 50 ditë të mbyllur mesatarisht. Po flasim për një situatë alarmante sa i përket stafeve tona dhe qiradhënësve tanë. E gjitha kjo situatë na zuri në një grackë. Biznesi jonë është e tillë, që të ardhurat e marra i riinveston dhe i rikapitalizon, pas pasur mundësi të kursejë.”

“Kemi bërë nga të gjitha gjërat për të ulur kostot në këtë periudhë. Edhe për stafin, që është kthyer disi në familjen tonë kemi bërë edhe shkurtime, edhe heqje të përkohshme. Është një situatë që nuk ka as të humbur dhe të fituar, por paraqitet absurde. ”

“Shpenzimet do bëhen të papërballueshme në një të ardhme të afërt. Do kemi qiradhënësit tek dera, do kemi furnitorët si dhe një pjesë të punonjësve që duan të dinë se çfarë do të ndodhi me ta. Nëse do hapemi do të ketë orare dhe ambiente të reduktuara, pra praktikisht 1/3 e stafit mund të nevojitet për punë. Hapja me orare është një dhimbje koke, pasi ne nuk dimë si të operojmë. Nuk kemi asnjë garanci se ku do të na dërgojë kjo hapje.”

Sa i përket masave që i kanë paraqitur Bashkisë Tiranë dhe qeverisë, Z.Jahaj shprehet se janë pika për të cilat mund të gjendet zgjidhje, nëse palët ulen në bisedime:

“Për taksën e hapësirave publike nga Bashkia, që derisa të ekzistojë masa e distancimit social, në mos e pamundur të hiqet, duhet të gjejmë një formë bashkëpunimi për ta shtyrë më tej. Nëse operojmë me 20% të hapësirës sonë publike, i bie duhet të paguajmë dhe 20% të taksës.

Nuk kërkojmë heqjen e taksave të tjera, por kërkojmë shtyrje për të marrë frymë. Bashkia ka reaguar dhe është pozitive në këtë pjesë.”

Ndërkohë për një nga kërkesat përfshin edhe subvencionimin e normave aktuale të interesit që z,Jahaj është shprehur:

“Shumica prej nesh kanë edhe kredi operuese. Ne mund t’i shtyjmë për disa muaj por kjo nuk është zgjidhje, pasi ne do t’i paguajmë sërish. Derisa situata të normalizohet, biznesi do operojë në mënyrën e duhur, prandaj duhet gjetur zgjidhje.”

Gjithashtu sa i përket paketave ekonomike nga qeveria, Z.Jahaj ka thënë se shumë biznese kanë ngecur në teknikalitete:

“Kemi aplikuar tek paketat, por shumica prej nesh kanë ngecur në pjesë teknikalitetesh, tek pjesa e kodeve dhe procedurave, por ende paratë nuk i kemi marrë. Por, dua t’i siguroj të gjithë se aplikimet janë bërë dhe tashmë po presim shqyrtimin e ankesave.”

Gjithashtu një nga pikat kërkon edhe uljen e TVSH-së si në nivelin e agroturizmit, gjë për të cilën z.Jahaj shprehet se është më se e drejtë

“Përsa kohë sektori i turizmit reagoi fort dhe mori një ulje të masës. Ne do vazhdojmë në të njëjtën mënyrë duke ndjekur dhe vendet e rajonit që e kanë ulur normën. TVSH-ja do të sjellë një frymë më të mirë ndërmjet bizneseve dhe qeverisë, por edhe në operimin e tyre. Po flasim për një biznes që është i ri në Shqipëri dhe jo i konsoliduar. Është gjithashtu zëri i dytë në të ardhurat e Buxhetit të Shtetit dhe për punësimin në Shqipëri. Këtë humbje të reduktimit të TVSH-së mund ta marrin në forma të tjera, prandaj mendoj se duhet të ulemi ta flasim.”

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.