“Argument” – Shoqata e Tour-Operatorëve: “Sektori i turizmit pret goditje të rëndë. Kërkohet stimul dhe mbështetje më e madhe nga ana qeverisë”
Në “Argument” me gazetarin Enio Civici ka qenë i ftuar Kliton Gërxhani nga Shoqata e Tour Operatorëve.
Z.Gërxhani ka bërë të ditura kërkesat e shoqatës kundrejt qeverisë shqiptare për rimëkëmbjen e sektorit të turizmit që ka marrë dy goditje të rënda si tërmeti i 26 nëntorit dhe pandemia e COVID-19.
Duke parë situatën në BE, e cila statiskisht tregon një krizë të pashembullt, në Shqipëri priten edhe më shumë pasoja:
“Dua të sjell disa statistika të Komisionit Europian që thotë se bizneset e turizmit në BE janë në një krizë akute likuditeti dhe theksojnë se janë në humbje deri në 50% te restorantet dhe në 85% te tour operatorët. Rezervimet kanë rënë nga 60% deri në 90%. Duke ditur se mesatarja e BE-së është më i mirë se një vend mesdhetar që është më i varur nga turizmi, këto shifra janë edhe më të rënda për Shqipërinë.
Më tej z.Gërxhani ka bërë të ditura kërkesat, të cilat janë parë në përputhje edhe me shembujt nga vendet fqinje. Një prej kërkesave të publikuara në media që krijoi kuriozitet ishte edhe ajo e bonuseve për familjet për t’i mundësuar pushime brenda vendit:
“Gjykuam se është një lajm që bën sens ekonomik. Është diçka që e ka bërë edhe Italia dhe sigurisht ka kritere përzgjedhëse. Familjeve i jepet një lloj bonusi që të bëjnë një pushim sado të shkurtër, duke përdorur zinxhirin e turizmit shqiptar, nga prenotimi në agjenci turistike deri tek akomodimi në hotel.”
Më tej nga qeveria kemi kërkuar stimulin e çdo tour-operatori të huaj dhe lokal, pasi nëpërmjet këtij subvencionimi mbulohen disa kosto të tjera dhe shërben si vlerësim për bizneset në Shqipëri. Është lënë në pezull edhe një sugjerim i z.Ahmetaj, një subvencionim i sigurimeve shoqërore dhe shëndetësore gjatë sezonit të ulët. Kjo masë zgjidh problemin e papunësisë dhe të kualifikimit. Këtë gjë e bën Greqia sot. Edhe kjo është diçka e kërkuar.
Kemi thënë të stimulohet tregu shqipfolës, jo vetëm i Shqipërisë, por edhe i Kosovës, Maqedonisë dhe Malit të Zi. Për Kosovën kërkesa është më specifike pasi kërkojmë edhe subvencionimin e taksës për Rrugën e Kombit.
Kemi kërkuar një subvencionim të voucherit që hyn tek kategoria e turizmit dalës dhe kërkojmë të njihet ky voucher që të mos goditen rëndë kompanitë ajrore që edhe pse nxjerrin shqiptarë jashtë shtetit, përsëri janë jetike.
Kemi kërkuar edhe atë që quhet “kredia zero” pa interes për sektorin tonë, por nuk po del realisht e tillë. ”
Një nga pikat e tjera dhe më të rëndësishme është heqja e karantinimit si dhe zbulimi i një date specifike se kur do të hapemi. Gjithashtu me shtetet që janë të ngjashme në impaktin e COVID-19 të krijojmë kanalet e udhëtimi.”
G.K / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.