“Argument” – Shqiptarët rrisin kërkesat për prona në bregdet. Ekspertët e imobiliareve shpjegojnë fenomenin
Në emisionin “Argument” me gazetarin Enio Civici mbrëmjen e sotme është përfolur rreth sektori imobiliar dhe si kriza e COVID-19 ka ndikuar në sjelljen e konsumatorëve ndaj tregut të pronave të patundshme.
Për të folur rreth kësaj në studio ishin dy eskpertë nga kompani të njohura imobiliare, Jonian Antoni dhe Eglent Bici.
Z.Bici ka shpjeguar se sektori imobiliar në Shqipëri nga kriza ka dalë me disa apsekte negative, por edhe pozitive:
“Sektori imobiliar shqiptar është në vështirësi, ashtu si e gjithë ekonomia jonë. Do doja që në analizën tonë të ndanim dy impakte, atë në afatshkurtër dhe afatgjatë. Ne kemi patur në periudhën afatshkurtër ka pasur ulje kërkesash të ndjeshme, me klientë më të tërhequr dhe gjithashtu janë ngadalësuar noterët dhe bankat.
Po ta shohim me optimizëm ka edhe disa faktorë pozitivë. Është rritur kërkesa në bregdet dhe rritje kërkesash nga Mali i Zi dhe Kosova, si dhe individët spekulatorë, të cilët blejnë prona për qëllim rishitje. Në afatgjatë varet gjithçka nga kura ose vaksina. Tregu imobliar do japi rezultatet e veta vetëm në 6 apo 8 muaj, ku do duket realisht efekti i krizës. Nëse vaksina del shpejt, do kemi vetëm 0-5% rënie çmimesh. Nëse vazhdon situata dhe vaksina del në fund të vitit, atëherë parashikojmë 5-10% rënie çmimesh. Ndërsa , skenari i tretë më pesimist ne planifikojmë 10-20% rënie. Pra, duhet kuptuar se po flasim për rënie çmimesh, ndërsa ajo e rënies së volumeve do jetë deri në 50%.”
Ndërsa, eksperti tjetër Eglent Bici në fjalën e tij ka lëshuar disa vërejtje për qeverinë dhe paketat e ndihmës financiare që kanë përjashtuar tregun imobiliar:
“Ne si sektor imobiliar nuk kemi qenë pjesë e ndihmës financiare, pasi sektori jonë quhej sikur ishte në punë sepse kemi sistem online. Kush është ai person që do pranonte në këto kohë një klient të shihte pronën. Ndryshe si ndodh në pjesën të madhe të botës, këtu pronari shet pronën ku banon vetë. Në raste të rralla janë ata pronarë që i kanë blerë dhe qëndrojnë bosh.
Ndërkohë siç edhe kolegu e tha kërkesat janë shtuar në bregdet, janë shtuar edhe shqiptarët e rajonit, por ka njëlloj ngurrimi dhe frike për të investuar. ”
Gjithashtu dy të ftuarit janë fokusuar edhe në shpjegimin e trendit të kërkesave për prona në bregdet. Sipas z.Antoni kjo vjen pasi qytetarët planifikojnë për të ardhmen kufizime në të udhëtuar:
“Klientët të cilët janë vënë përballë një supozimi ku për dy deri në tre vjet do jetë lëvizja ajrore e bllokuar dhe duke qenë se ne kemi një bregdet të bukur, të paeksploruar, shumë shqiptarë nga Kosova dhe vendi planifikojnë të rikthehen drejt bregdetit për pushime, pasi i ofron të gjitha kushtet.
Ndërsa, për z.Bici pronat në bregdet tashmë përdoren si vende për të jetuar, pasi ofrojnë më shumë komoditet se banesat në qendra të mëdha
“Ka shumë shqiptarë që jetojnë nëpër qytete kryesore, të cilët po mendojnë të mos jetojnë në qytet, por drejt bregdetit. Njoh kolegë të ciëlt kanë lëvizur gjatë këtyre maujve në bregdet dhe vijnë vetëm për punë në qytete. Shumë fshatra turistikë në zonën e plazhit tashmë janë të gjitha të banuar. Kjo mendoj se është dhe arsyeja pse shumë njerëz po zgjedhin të investojnë në prona të tilla. ”
G.K/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.