“Argument” – Tenderi ndërkombëtar për Rindërtimin, ja çfarë mendojnë ekspertët
Në emisionin e mbrëmjes së sotme “Argument” nga Enio Civici është diskutuar rreth masave të reja ekonomike që kryeministri Rama dhe qeveria ka premtuar për të vazhduar gjatë dy viteve të ardhshme.
Sfida e vërtetë është rilindja e ekonomisë shqiptare dhe për të arritur drejt këtij objektivit qeveria ka menduar nëpërmjet tre strategjive. Si fillim sekuestrimi i pasurive të paligjshme, nëpërmejt Operacionit Forca e Ligjit, së dyti fondet e marra nga Konferenca e Donatorëve që do të jenë një stimul i madh në ekonomi, që do të përdoren për Rindërtimin dhe ajo e treta është amnistia fiskale e plotë e kapitalit.
Sfida e tretë është ajo që ka ngjallur më shumë interes në opinionin publik, pasi është e mbushur plot kontradikta. Gjithashtu kjo nismë është tentuar nga “Qeveria Berisha” në vitin 2011, por nuk arriti të finalizohej me sukses.
Të ftuar për të folur rreth kësaj teme në studio ishin Pajtim Melani, Mark Crawford, Genti Beqiri dhe Klodian Muço.
Pyetja e parë shtruar për të ftuarit ishte diskutimi mbi njoftimin e kryeministrit Rama, i cili ka shpallur projektin e parë të Rindërtimit si një thirrje tenderi ndërkombëtare, që lejon dhe kompanitë e huaja të marrin pjesë në garë.
Genti Beqiri shprehu mendimin se tenderi ndërkombëtar mund të zgjasë më shumë në afate, por do të jetë një faktor vendimtar në proces pasi do të ofrojë mundësinë më të shtuar të transparencës së fondeve dhe mund të luajë një rol më të mirë në koordinimin e të gjitha palëve.
Ndërkohë, eksperti i ekonomisë Pajtim Melani tha se projekti i njoftuar nga kryeministri është një mjaft ambicioz me shumë lote në brendësi të tij, dhe që do të ketë hapësira për shumë kompani që të punojnë.
Ndërsa, Mark Crawford shprehu një mendim më alternativ, ku sipas tij kompanitë shqiptare kanë njohuri më të mira të tregut dhe në këtë mënyrë një efikasitet më të madh në ndërtimet që bëjnë, sesa kompanitë e huaja, që mund të përballen me vështirësi të reja. Sipas tij është e pamundur për kompanitë e huaja të veprojnë pa një bashkëpunim me ato vendase.
Profesori i ekonomisë Muço është shprehur se tenderi është i përmasave të mëdha dhe për këtë arsye nevojitet një forcë e shtuar punëtore, prandaj kam përshtypjen që do të jetë patjetër një bashkëpunim me kompani shqiptare. Paratë sipas tij do të mbeten patjetër në Shqipëri, pasi forca punëtore do të punojë dhe jetojë në vendin tonë.
Geri Kolgega / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.