Ari, drejt rritjes javore /Mbështetet nga përhapja e variantit Delta. Pritet raporti i punësimit në SHBA
Ari është rritur në tregtinë e së Premtes, prej shqetësimeve mbi përhapjen e variantit Delta të koronavirusit, ndërkohë që investitorët presin dhe publikimin e të dhënave mbi punësimin në SHBA. Norma spot e arit u rrit me 0.1% në 1,778.52 dollarë për onz. Analistët thonë se përhapja e variantit Delta po mbështet arin, pasi mund të vonohet rimëkëmbja ekonomike. Varianti tejet i transmetueshëm ka bërë që vende në Azi dhe Europë të vonojnë planet e rihapjes, ndërkohë që Shtëpia e Bardhë bëri të ditur se do të dërgojë ekipe speciale në zonat e nxehta për të luftuar virusin. Vëmendja e investitorëve qëndron tek publikimi i raportit të punësimit në SHBA, që pritet të tregojë një rritje prej 690,000 vende pune në muajin Qershor. Dollari ka qëndruar në nivelin më të lartë në 3 muaj, duke e bërë arin të shtrenjtë për mbajtësit e valutave të huaja. Analistët thonë se ndërsa faktorë të tjerë si tërheqja e stimujve monetarë nga Rezerva Federale mund të ushtrojnë presion tek metali, shqetësimet mbi inflacionin do të balancojnë çmimet në afat-shkurtër.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.