Ari e nis javën në qëndrueshmëri – Rënia e besimit konsumator në SHBA qetëson investitorët

Ari po shfaqet i qëndrueshëm në sesionin e sotëm, duke u tërhequr lehtë nga niveli më i lartë në 1 javë të regjistruar të premten. Forcimi i lehtë i dollarit amerikan dhe rënia e besimit konsumator në SHBA largoi shqetësimet për shtrëngimin e politikave monetare nga Rezerva Federale. Ari po tregtohet pranë 1,773 dollarëve për onz, ndërsa të premten preku nivelin më të lartë që nga 6 gushti.

Tashmë pritshmëritë janë që Rezerva Federale të mos ulë agresivisht programin e blerjes së bonove, për shkak të rritjes së infektimeve me Covid-19. Të premten e javës së kaluar, metali i çmuar u rrit me 1.5%, pasi të dhënat në SHBA treguan një rënie të ndjeshme të besimit konsumator gjatë gushtit, që preku nivelin më të ulët në një dekadë.

Gjithashtu, investitorët janë në pritje të procesverbalit të takimit të fundit të Rezervës Federale dhe komenteve që do të bëjë shefi i këtij institucioni, Jerome Poëell të martën. Gjithashtu, investitorët po ndjekin me një interes të veçantë edhe situatën në Afganistan, pas rënies së qeverisë dhe marrjes së pushtetit nga talebanët.

Me mijëra afganë janë grumbulluar në aeroportin ndërkombëtar të Kabulit, në përpjekje për tu larguar nga vendi, i cili tashmë është plotësisht në duart e talebanëve, pas largimit të plotë të forcave amerikane.

Klevis Llaha/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.