Ari, në nivelin më të lartë në 1 javë – Mbështetet nga rritja e infektimeve me Covid-19 në SHBA dhe Kinë
Ari i është rikthyer fitimeve në sesionin e sotëm, duke prekur nivelin më të lartë në më shumë se 1 javë, pasi rritja e infektimeve me variantin Delta të koronavirusit ka rikthyer shqetësimet mbi impaktin në rimëkëmbjen ekonomike.
Për këtë arsye, investitorët kanë preferuar asetet e sigurta, ku bën pjesë edhe ari. Metali i çmuar po tregtohet në rreth 1,791 dollarë për onz. Analistët shprehen se rritja e infektimeve me Covid-19 në Shtetet e Bashkuara të Amerikës dhe në Kinë dhe parashikimet për ngadalësimin e rritjes ekonomike globale në gjysmën e dytë të këtij viti do të mbështesë edhe në vijim metalin e çmuar.
Të dhënat e fundit kanë treguar një rënie të besimit konsumator në Shtetet e Bashkuara, ndërsa indeksi që mat aktivitetin e biznesit prodhues në shtetin e Nju Jorkut ra më shumë se parashikimet e analistëve.
Edhe në Kinë, të dhënat e publikuara treguan se prodhimi në fabrika dhe rritja e shitjeve me pakicë u ngadalësua ndjeshëm gjatë korrikut, për shkak të shpërthimit të vatrave të reja me Covid-19, të dhëna që kanë shtuar shenjat e ngadalësimit në ekonominë e dytë më të madhe në botë.
Gjithashtu, investitorët po presin të dhënat mbi shitjet me pakicë në Shtetet e Bashkuara dhe procesverbalin e takimit të fundit të Rezervës Federale. Fokusi është i përqëndruar edhe te përshkallëzimi i tensioneve në Afganistan, ku talebanët kanë marrë tashmë pushtetin.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.