Ari, në nivelin më të lartë në 2 javë – Përhapja e variantit Delta rrit kërkesën për asete të sigurta
Ari është rritur edhe në sesionin e sotëm dhe po qëndron në nivelin më të lartë në dy javët e fundit. Çmimet vijojnë të mbështeten nga rritja e infektimeve me variantin Delta të koronavirusit, që ka detyruar investitorët të preferojnë asetet e sigurta, ku bën pjesë edhe ari. Metali i çmuar po tregtohet në rreth 1,792 dollarë për onz, niveli më i lartë që nga 6 gushti.
Analistët shprehen se tashmë fokusi është përqëndruar te varianti Delta i koronavirusit, që mund të ngadalësojë rritjen e ekonomisë globale. Në këtë situatë, ari mund të gjejë më shumë mbështetje, pasi shihet si një aset i siguritë në periudha pasigurish. Ngadalësimi i ekonomisë globale u konfirmua edhe nga të dhënat mbi shitjet me pakicë në SHBA, që ranë më shumë se parashikimet e analistëve, gjatë korrikut.
Gjithashtu, investitorët po presin edhe procesverbalin e takimit të fundit të Rezervës Federale, për të mësuar më tepër detaje mbi politikat monetare. Njëkohësisht, shefi i Rezervës Federale, Jerome Powell, deklaroi se ka shumë paqartësi mbi shpërthimin e variantit Delta dhe efektin që do të ketë në ekonomi. Analistët vlerësojnë se objektivi i çmimit prej 1,801deri në 1,811 dollarë për onz është braktisur përkohësisht dhe do të arrihet vetëm nëse ari i thyen nivelin teknik prej 1,795 dollarë për onz.
Klevis Llaha/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.