Ari rritet në nisje të javës / Në nivelin më të lartë në 3 muaj prej pandemisë dhe yieldit në SHBA
Çmimet e arit janë rritur ditën e Hënë në nivelin më të lartë në 3 muaj, prej rënies së interesave të borxhit në SHBA dhe shqetësimeve mbi rritjen e infeksioneve të Covid-19 në disa vende aziatike. Norma spot e arit u rrit me 0.6% në 1,854 dollarë për onz, pasi shënoi nivelin më të lartë që prej 2 Shkurtit. Yieldi benchmari i titujve 10-vjeçar në SHBA, ra në nivelin më të ulët në thuajse 1 javë, duke ulur koston oportune të mbajtjtes së arit. Singapori do të mbyllë shkollat këtë javë, pasi raportoi numrin më të lartë të infeksioneve në disa muaj, ndërsa Tajvani vendosi ndalim të lëvizjes dhe mbledhjeve. Në Indi, vendin e dytë më të goditur pas SHBA, numri i infeksioneve po arrin 25 milionë. Këto shqetësime kanë rritur kërkesën për metalin e çmuar, që konsiderohet si aktive e sigurtë. Investitorët presin gjithashtu rezultatin e takimit të fundit të Rezervës Federale, për të marrë më shumë detaje mbi komentet e bankës mbi rritjen e inflacionit. Ari shihet si mbrojtës nga inflacioni.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.