Ari “tërhiqet” lehtë – Dyshime mbi kalimin e shpejtë të stimujve në SHBA
Çmimet e arit janë tërhequr në nisje të Javës, për shkak të shqetësimeve se paketa gjigante e stimujve ekonomikë në SHBA, mund të mos kalojë aq lehtë sa pritej. Megjithatë, dobësimi i dollarit amerikan, ka limituar disi humbjet. Norma spot e arit ra në 1,850.9 dollarë për onz, pasi kishte humbur gati 1% në sesionin e kaluar. Administrata e Biden u përpoq të zbusë shqetësimet e republikanëve se paketa e pandemisë prej 1.9 trilionë dollarë është shumë e shtrenjtë.
Analistët thonë se debati ka vendosur në pikëpyetje kalimin dhe shpejtësinë e paketës së stimujve. Ari konsiderohet si një mbrojtës nga inflacioni, që pritet të vijë nga stimujt ekonomikë. Dollari ra me 0.1% kundër valutave rivale, duke e bërë arin më të tërheqshëm për mbajtësit e valutave të tjera. Investitorët presin tashmë takimin mujor të Rezervës Federale më 26-27 Janar.
Sistemi bankar qendror pritet të ketë një qasje konservatore dhe të shqyrtojë më shumë të dhëna, pasi efektet e afat-shkurtër në trajtimin e pandemisë agresivisht, mund të cënojnë aktivitetin ekonomik të brendshëm. Megjithatë, analsitët thonë se perspektiva në të ardhmen për metalin e çmuar është optimiste, e për rrjedhojë çmimet mund të rikthehen në 1,880 dollarë për onz.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.