Ari “tërhiqet” në sesionin e së Enjtes / Niveli më i ulët në 1 javë prej rritjes së dollarit dhe interesave të Thesarit
Ari ka rënë në nivelin më të ulët Javor ditën e Enjte, prej rritjes së yieldeve të Thesarit dhe dollarit të fortë, ndërkohë që rritja e inflacionit shtoi pritshmëritë për tkurrjen e politikave monetare. Norma spot e arit ra me 0.1% në 1,814,21 dollarë për onz, pasi preku nivelin më të ulët që prej datës 6 Maj. Interesat 10-vjeçare të Thesarit në Shtetet e Bashkuara u rritën në nivelin më të lartë në 1 muaj, ndërsa indeksi i dollarit shtoi 0.2% ndaj shportës së valutave rivale. Të dhënat kësaj jave treguan se çmimet e konsumit në SHBA janë rritur me normën më të lartë në 12 vite në Prill, duke rritur pritshmëritë për një tkurrje të hershme të politikave monetare nga Rezerva Federale. Megjithatë, politikëbërësit e bankës qendrore thanë se të dhënat surprizuese të tregut të punës dhe inflacionit për muajin prill, nuk kanë ndikuar tek planet e bankës për të mbështetur ekonominë. Rezerva Federale ka premtuar të mbajë interesat e ulëta deri sa ekonomia të arrijë punësimin e plotë dhe inflacioni të arrijë 2%.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.