Ari tregtohet i qëndrueshëm / Pritet të tregojë rritje javore prej dobësimit të dollarit
Ari është rritur në sesionin e së Premtes dhe pritet të tregojë rritjen e parë javore në 1 muaj, nxitur nga rënia e dollarit dhe ndërkohë që investitorët presin të dhëna mbi inflacionin. Sinjalet kontradiktore nga Rezerva Federale mbi normën bazë të interesit shkaktuan një rënie me 6% në javën e kaluar, ndjekur nga një rimëkëmbje me rreth 1% këtë Javë. Norma spot u rrit me 0.2% në 1,779.50 dollarë për onz në nisje të tregtisë. Sipas analistëve, shqetësimet mbi inflacionin janë arsyeja e vetme që çmimet nuk po vazhdojnë rënien. Ari shihet si një mbrojtës ndaj inflacionit, që pritet të vijë nga masat e stimujve. Në afat-mesëm, rimëkëmbja e ekonomisë amerikane duhet të fuqizojë dollarin, çka do të shtojë presionet tek ari. Indeksi i dollarit po i drejtohej rënies javore, pas një rritjeje me rreth 2% në javën e kaluar, prej komenteve të Rezervës Federale. Megjithatë, kryetari i Rezervës Federale, Jerome Powell, tha këtë Javë se inflacioni nuk është përcaktori i vetëm i vendimeve mbi normën e interesit. Sipas analizave teknike, niveli i suportit qëndron në 1,769 dollarë për onz dhe nëse thyhet, ari do të bjerë në një varg prej 1,734-1,744 dollarë.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.