Arkeologët zbulojnë “Kishën Sistine” 12 mijë vjeçare – Në mure, specie që nuk ekzistojnë më

Në Kolumbi, në një pjesë tejet të thellë të pyllit të Amazonës, është zbuluar diçka e jashtëzakonshme dhe me një madhësi të rrallë. Gjetja është një nga koleksionet më gjigande në botën e artit shkëmbor parahistorik, një zbulim spektakolar që, për shkak të bukurisë dhe detajeve që përmbante, u quajt menjëherë “Kishëz prehistorike Sistine”.

Këto vepra arti shkëmbore në fakt, janë dhjetëra mijëra, në një zonë prej 12 kilometra mure shkëmbore, të mbuluara me piktura kafshësh, bimësh, njerëzish dhe simbolesh të krijuara deri në 12.500 vjet më parë. Zona arkeologjike është e vendosur në “Serrania de la Lindosa”, në Kolumbi.

Imazhet përfshijnë njerëz të përfshirë në skena të jetës, vallëzim ose duke u kapur për dore, shumë kafshë, përfshirë peshq, breshka, hardhuca dhe zogj, plus elemente natyrore, linja dhe forma gjeometrike.

Ajo çka është më interesante është se si në gravura dhe vizatime gjenden imazhe të kafshëve të zhdukura dhe specie që banonin në tokë më shumë se dhjetë mijë vjet më parë dhe që përmes këtyre vizatimeve kanë mbetur të gdhendura përgjithmonë në shkëmb, duke na bërë të zbulojmë civilizime, tanimë të humbura dhe të largëta.

Vendi u zbulua nga një ekip studiues britaniko-kolumbian, i udhëhequr nga José Iriarte, profesori i arkeologjisë në Universitetin e Exeter dhe një nga ekspertët kryesorë në historinë e Amazonës.

Burimi origjinal: Positizie.it

Përshtati në shqip: SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.