Arkëtimet nga aksioni i ujit – Gjiknuri: Të përdoren për të shëndoshur gjendjen financiare të kompanive

Rikthimi i ligjshmërisë në konsumin e ujit ka qenë edhe apeli i Ministrit të Infrastrukturës dhe Energjisë, Damian Gjiknuri gjatë inspektimit në një nga qendrat e Kujdesit ndaj Klientit në Ujësjellësin e Elbasanit.

Sipas Gjiknurit, lufta ndaj informaliteti në këtë sektor ka hyrë në një fazë intensive, duke shtuar se në disa zona ka nevojë edhe për përmirësime. Lidhur me Elbasanin, Gjiknuri tha se ka nevojë për më shumë përpjekje në këtë sektor.

“Këtu në Elbasan mendoj se ka nevojë për më shumë përpjekje. Qeveria është treguar bujare dhe mbështetëse me Bashkinë e Elbasanit, me ndërmarrjen e ujësjellës-kanalizimeve duke dedikuar mbi 3 milion euro investime. Investimet do të vazhdojnë por ne presim të kemi një performancë më të mirë nga ndërmarrja e ujësjellësit”, u shpreh Gjiknuri.

Ndërkohë, Drejtori i Ndërmarrjes së Ujësjellës-Kanalizimeve në Elbasan deklaroi se po ushtrohen kontrolle ndaj të gjithë abonentëve në terren për verifikimin e lidhjeve të paligjshme dhe formalizimin e tyre.

Në kuadër të aksionit për rikthimin e ligjshmërisë në konsumin e ujit, Gjiknuri tha se së bashku më Ministrin e Financave dhe Ekonomisë, Arben Ahmetaj kanë firmosur një shkresë të përbashkët, përmes të cilës iu kërkohet kryetarëve të bashkive që të disiplinojnë shpenzimet dhe të mirëadministrojnë të ardhurat e krijuara shtesë si rezultat i këtij aksioni. Sipas tij, këto të ardhura duhet të përdoren për përmirësimin e gjendjes financiare të kompanive.

“Së bashku me Ministrinë e Financave kemi vendosur që ky proces të normohet në mënyrën e duhur. Pra, që këto të ardhura të paplanifikuara të mos përdoren siç ndodh ndonjëherë nga ndërmarrjet për shpenzime personeli apo blerë gjëra të panevojshme. Duhet të përdoren për të shëndoshur gjendjen financiare të kompanive si dhe për të likuiduar detyrimet që mund të ketë ndaj sektorit të energjisë elektrike,” theksoi Gjiknuri.

Ndërkohë, shtoi se qeveria ka për qëllim që këto ndërmarrje të forcohen dhe të menaxhohen në mënyrën e duhur, ku në këtë kuadër po  ndërmerren edhe një sërë masash.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.