Arrihet marrëveshja midis Ryan Air dhe Sindikatës së Pilotëve gjermanë!

Ryanair njoftoi se kishte arritur një marrëveshje paraprake me sindikatën e pilotëve  gjermane (VC) mbi pagat dhe përfitimet me qëllim dhënien fund të revoltës 1-vjeçare.

VC ishte përgjegjës për grevën e parë të pilotëve të Ryanair në dhjetor të vitit të kaluar. Ryanair, e cila është përballur me një seri grevash në Europë këtë vit, ka thënë se shpreson të arrijë marrëveshje me sindikatat në tregjet e saj kryesore përpara fundit të marsit.

Marrëveshja katërvjeçare përfshin dakordësinë mbi pagën, pensionin, ndihmat e pilotëve dhe pushimet vjetore. Të gjitha këto do të përfshihen në dokumente të detajuara që do të nënshkruhen deri në fund të shkurtit, tha kompania ajrore me kosto të ulët më e madhe e Europës.

“Megjithëse nuk është një marrëveshje e plotë ende, ky është një progres i qartë nga Ryanair dhe sindikata e pilotëve, e cila ka qenë një nga sindikatat më shqetësuese deri tani” – tha analisti i kompanisë Mark Simpson sipas CNBC. “Duke marrë parasysh progresin nuk ka gjasa për një grevë gjermane në Krishtlindje” shtoi ai.

Aksionet e Ryanair u rritën me 1.3 për qind në 11.67 euro.

E.T/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.