Arsyeja pse po ikën elita shqiptare – Raporti i publikuar në Davos, jemi të paaftë ta menaxhojmë
Në Davos të Zvicrës, aty ku ka nisur punimet Forumi Ekonomik Botëror, më i rëndësishmi dhe më i madhi në glob, është prezantuar një tjetër raport me rëndësi, Indeksi Global i Konkurrueshmërisë së Talenteve 2018. Ky raport përpilohet nga “Insead”, që është Shkolla e Biznesit të Botës dhe nga grupi Adecco.
Në indeksin e këtij viti, Shqipëria renditet e 78-ta në botë, ndër 119 vende, duke u pozicionuar e parafundit në rajon dhe e treta nga fundi, së bashku me Moldavinë dhe Bosnje Hercegovinën në kontinent.
Ky raport është një mjet mjaft i mirë për të bërë krahasime dhe për të matur mënyrën se si shtete të ndryshme dhe qytete, rrisin, tërheqin dhe i mbajnë talentet, duke u bërë kështu një armë e fortë në duart e politikbërësve në mënyrë që të adresojnë problematikat kyçe në këtë drejtim.
Konkurrueshmëria e talenteve është një ndër elementët kyç të rritjes së qëndrueshme ekonomike dhe të ardhmes së një ekonomie. Ndërkohë që sot, Shqipëria renditet e 78-ta në botë, një vit më parë renditej në vendin e 80-të.
Pavarësisht kësaj ka humbur në pikëzim, çka do të thotë se është përkeqësuar në krahasim me veten. Por, kjo nuk e ka ndaluar të zbresë nga vendi i fundit në Europë, në vendin e tretë nga fundit, duke parakaluar Moldavinë dhe Bosnje Hercegovinën. Fakti se Shqipëria është në fund të Europës, e thotë edhe raporti, duke e marrë si shembull për heterogjenitetin e Europës në këtë drejtim.
Sa i përket nën—indikatorëve, që janë të shumtë, rreth 80 të tillë, Shqipëria performon keq në drejtim të thithjes së trurit,, e 102-ta në botë, ndër 119 shtete, në drejtim të mbajtjes së trurit, e 101-ta në botë, në drejtim të impaktit që kanë talentet në shoqëri, vetëm e 109-ta, apo mbrojtja sociale, e 104-ta.
Të gjithë këta nën-indikatorë janë tregues mjaft të mirë të arsyes se përse ikin realisht nga vendi shqiptarët e mirëarsimuar.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.