Arta Marku në Vetting – Kritika nga ONM për mosparaqitjen dhe një dënim ekstrem në 2016
Kryeprokurorja e Përkohëshme Arta Marku duket se kalon me sukses testin e pasurisë dhe të integritetit personal, ndërkohë që një dënim i dhënë në vitin 2016 për drejtim mjeti në gjendje të dehur është diskutuar gjatë nga Trupa Gjykuese e Komisionit të Vetting-ut dhe nga përfaqësuesi i ONM-së, Theo Jacobs. Të martën paradite ka qenë radha e Kyeprokurores Arta Marku t’i nënshtrohej seancës dëgjimore të Vetting-ut., e cila ka zgjedhur të mos paraqitet personalisht, por të përfaqësohej nga Avokatja Lirime Çukaj. Fakt që është kritikuar si nga kreu i Trupës Gjykuese Genta Bungo, ashtu dhe nga përfaqësusesi i Organit Ndërkombëtar të Monitorimit Jacobs.
Shkak i rezervave ndaj Arta Markut është bërë një vendim i dhënë prej saj në vitin 2016, i cili është konsideruar masë ekstreme nga Trupa e KPK-së si dhe përfaqësuesi i ONM. Marku ka lënë në arrest në paraburgim për dy javë një person të kapur në flagrancë teksa drejtonte makinën në gjendje të dehur, i cili më pas është dënuar me dy muaj heqje lirie, dënim që është shlyer me periudhën e paraburgimit.
Përfaqësuesi i ONM e ka komentuar gjatë rastin në fjalë, duke e konsideruar vendim të çuditshëm. Jacobs tha se me përvojën e gjatë në sistem, Marku është në gjendje të kuptojë plotësisht një shkelje të lehtë nga një krim i cili duhet dënuar me heqje lirie. Duke shtjelluar rastin në fjalë, Jacobs kërkoi të jepte një mesazh për gjithë sistemin shqiptar të Drejtësisë, i cili, sipas tij, e tepron me masat e paraburgimit. Ky problem, tha Jacobs, është i pranishëm edhe në vende të zhvilluara, por duhet të adresohet medoemos nga ana e Institucionit të Prokurorisë. Vendimi përfundimtar për konfirmimin e apo shkarkimin nga detyra të Arta Markut do të jepet të mërkurën më 4 korrik.
Vetëm pak minuta pas seancës së Markut, Komisioni i Pavarur i Kualifikimit ka konfirmuar në detyrë Vatë Stakën, një tjetër prokuror nga Shkodra. Staka ka kaluar me sukses të tre komponentët e Vetting-ut, atë të pasurisë, të integritetit personal dhe profesionalizmit.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.