Artan Lame: Pas pak ditësh vende pune në të gjitha qarqet tek ALUIZNI. Por, kujdes…!
Artan Lame ka ardhur me një deklaratë paksa ndryshe lidhur me konkursin që ALUIZNI po zhvillon për vende të lira pune në të gjitha drejtoritë Rajonale të Shqipërisë. Ai u ak bërë thirrje të gjithë aplikantëve që ta marrin seriozisht sepse shumë prej tyre do të punësohen bazuar në CV-të e tyre.
Po ashtu, thekson që të lënë mënjanë ndërhyrjet dhe miqtë sepse sipas tij, të vetimin efekt që kanë është ta shohin me inat mikxhiun.
“Djem e vajza,
Pas disa ditësh ALUIZNI do të organizojë një konkurs për vende të lira pune në të gjitha drejtoritë Rajonale, prej Shkodrës e deri në Sarandë.
Lajmërimi zyrtar ka ditë që është publikuar dhe besoj që e keni parë.
Ç’ka më ka bërë përshtypje jane pirgjet me dosje aplikimi dhe numri i madh i CV-ve të mbërritura.
Ju lutem të gjithëve, merreni seriozisht dhe mos e konsideroni si nga ato konkurset e llojit “më ka çu nona me la gojën”. “Nona” kësaj radhe do vërtet të punësojë njerëz që do t’i bëjnë hyzmetin punës.
Edhe po s’ja dolët kësaj radhe, mos u mërzisni, jeta ka edhe rrëzime e, veç kësaj, pas disa muajsh do të organizohet një tjetër konkurrim masiv, në të cilin përpjekja juaj e tanishme do të vlejë.
Aman, në keni perëndi, mjaft me miq, ndërhyrje, e më the të thashë, se të vetmin efekt që kanë, është ta shoh me inat mikxhiun.
Deputetë e ministra, partiakë e funksionarë, kanë gjithë të drejtën e tyre të interesohen për njerëz ndaj të cilëve kanë detyrime partie, elektorati, e më the të thashë. Por ndërhyrja merr fund tek kandidimi i të mbështeturit prej tyre. Pas atij momenti, e ka fjalën komisioni.
Çuna, goca që do kandidoni, besojeni këtë përpjekje që po bëni, duke u përpjekur të provoni muskujt tuaj dhe jo muskujt e mikut.
Unë vetë ja kam dalë vetë në jetë, se hera e fundit që kam futur mik babin, ka qenë në vitin 1988, që të më regjistronte në një ekspeditë verore arkeologjie në Luaras të Kolonjës.
Suksese të gjithëve në provën tuaj,
Artan Lame”
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.