Asambleja e PS, Rama: Në 4 vitet e ardhshme do të kryejmë reforma intensive në çdo institucion
Kryeministri Edi Rama deklaroi para mbledhjes së Asamblesë së Partisë Socialiste se në katër vitet e ardhshme vendi do qeveriset nga një timon, por me bashkëudhëtarë dhe bashkëqeverisje me qytetarët shqiptar. Rama theksoi se në mandatin e dytë reformat do jenë edhe më intensive në çdo institucion.
“Dua të jem menjëherë fare i qartë, bashkëqeverisja me njerëzit e zakonshëm nuk është togfjalësh propagandistikë, është një sfidë reale për të ndërtuar dhe vënë në funksionim një koalicion real, ky proces është baras me krijimin e një force të re politike. Jemi në fillesën e një projekti të ri politik me frymëzimin nga poshtë dhe me reflektimin tonë nga lart. Urgjenca e ndryshimit është tamam ajo që u mëshirua si një motivim popullor dhe që u materializua si një fuqi popullore me shumicën tonë absolute”.
Rama e konsideroi këtë mandat të ri si më të vështirin për të përmbushur detyrat dhe për të çuar para vendin.
“Urgjenca e ndryshimit është tamam ajo që na mundësoi ne privilegjin për të udhëhequr si një forcë e vetme Shqipërinë, pavarësisht të gjitha rrengjeve që na organizuan nga të katërta anët. Ky është mandati ynë më i vështirë që kur unë jam në këtë detyrë. Fati i kësaj supësrfide varet nëse ne do ta mbrojmë këtë super-pushtet nga vetvetja, nga sa dhe si do ta ndajmë me njerëzit e zakonshëm pushtetin që na është dhënë. Ne kërkuam mandat kuqezi dhe morëm një mandat kuqezi, për t’u ngritur mbi vetveten. Tipari themelor i këtij mandati kuqezi, duhet të jetë gjallë a vdekur besnikëria ndaj interesave të vendit dhe ndaj çdo qytetari të zakonshëm. Duhet të jemi një parti besnike, një grup parlamentar besnik. Ne do të qeverisim me kurajo ndaj çdo qëndrueshmërie për të ruajtur status-quo-n! Jemi vendi me më pak punonjës administrate në rajon dhe jemi vendi me më shumë drejtor në rajon. sepse jemi vendi i tepsive. Do të kryejmë reforma intensive në çdo institucion”.
Qeveria e re sipas Ramës do të jetë në gatishmëri për të dialoguar me opozitën, dhe për të mos lënë asnjë punë pasdore.
“Së katërti do të jetë gatishmëria për dialog me opozitën, por pa lënë asnjë punë të sotme për nesër. Do të adoptojmë një sjellje pro aktive ndaj opozitës. do t’i shtrijmë dorën në çdo hap. Duhet të mësohemi edhe si detyrim i mandatit dhe përbërjes të atyre që na kanë votuar. Në vijimësi, për çdo çështje dhe për çdo akt. Por, ama nuk do të qëndrojmë në vend duke pritur opozitën. Së pesti, mandati do të karakterizohet në operacione jo konvenciale në zhvillimin ekonomik si dhe ndaj luftës kundër korrupsionit”.
Puna e qeverisë së re do të nis që këtë janë me ministrinë e financave.
“Do të nisim që këtë javë punën me ministrin e financave për ta zgjeruar programin 1 miliard në zhvillim dhe për ta zgjeruar programin në vjeshtë për infrastrukturë, shkolla dhe spitale. Do të bëjmë largime në bllok drejtorësh siç janë drejtoritë e të ashtuquajtura të bujqësisë. Ose e famshmja, policia gri sepse arsye e ekzistencës së këtyre strukturave ka vdekur me kohë por ato janë mbajtur në jetë dhe janë fryrë nga sistemi kanceroz i koalicioneve”.
Rama: Jemi zgjedhur të rrisim ekonominë me 5%. Uroj që bashkëpunimi më kreun e opozitës të vazhdojë
Rama deklaroi se dëgjesat e realizuara gjatë një muaji pas zgjedhjeve do të vazhdojnë gjatë katër viteve.
“Dëgjesat me popullin do jenë të vazhdueshme, do intensifikohen të gjitha problemet e ngritura. Janë njerzit që na sollën këtu, ne ose do bashkëqeverismim me ta, ose s’do jemi këtu. Populli nuk do na i kursej një shkelm trupit, nëse ne nuk bëjmë atë që në kemi thënë gjatë daljes në rrugë me popullin. Ne nuk kthejmë kurrizin sa marrim votat”.
Kreu i qeverisë tha se do udhëheqin vendin duke u fokusuar te ajo për çfarë janë zgjedhur.
“Nuk do kursejmë luftën ndaj të korruptuarve, pa pasur parasysh miqve, krushqve. Asnjë mik nuk vlen sa një votues që na besoj timonin. Ne u zotuat solemnisht për këtë luftë, ne jemi zgjedhur të drejtojmë Shqipërinë me fjalë dhe vepra. Jemi zgjedhur të rrisim ekonominë më 5 % brenda harkut të këtij mandati, dhe duhet ta arrijmë. Ne jemi zgjedhur për të rritur vendet e punës, jo për tu marrë me opozitën. Ne do të dëgjojmë me shumë vëmendje dhe qetësi se çfarë do na thonë opozitarët dhe do marrin në konsideratë sa herë që ata kanë të drejtë. Do udhëheqim pa humbur fokusin”.
Kryeministri u ndal edhe tek marrëveshja politike me opozitën, i cili shtoi që bashkëpunimi duhet të vazhdojë për të mirën e vendit dhe qeverisjes.
“Uroj që marrëveshja politike që i hapi rrugë zgjedhjeve, e para në histori, uroj që të mos ketë vdekur. Ta konsiderojmë në arritje të mirëqenë për të gjithë. Uroj që me kryetarin e opozitës të vazhdojmë atë që nisëm, pavarësisht prirjeve. Për të mirë të vendit dhe qeverisë”.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.