Ashpërohen masat për abuzuesit – Kundërshton opozita : Nuk ka arsye të nxitojmë
Ndryshimet e fundit penale të iniciuara nga 11 deputetë të mazhorancës, që synojnë ashpërsim të masave për abuzimet me sigurinë ushqimore, mjedisin, dhunën kundrejt funksionarëve publike apo neglizhencën e mjekëve janë diskutuar në Komisionin Parlamentar të Çështjeve Ligjore.
Prezentë në komision, një pjesë e deputetëve të opozitës, nuk kanë qenë dakord me ndryshimet, me argumentin se nuk ka arsye që të jenë emergjente, ndërsa kanë kërkuar që të rishikohet në tërësi Kodi Penal, në mënyrë që t’i rezistojë kohës. Po ashtu kanë kërkuar që të jetë edhe pakica, pjesë e propozimeve. Vetëm deputetja e LSI-së, Aurora Mara ka mbështetur shumicën.
Mazhoranca është treguar e hapur për të mirëpritur sugjerimet e opozitës lidhur me këtë draft, ndërsa i kanë konsideruar ndryshimet jetike për vendin.
Komisioni ka miratuar në parim ndryshimet në kodin penal, ndërsa për miratim në Parlament kërkohen 94 vota.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.