“Asnjë” makinë amerikane në Japoni – Nuk i përshtaten tregut. E kanë fajin prodhuesit
Makinat amerikane janë të rralla në rrugët e Japonisë dhe nëse rastis ndonjë, sipas analistëve ka shuma gjasa që të jetë një Jeep Wrangler. Ndërkohë që markat japoneze mbushin rrugët dhe parkingjet në Shtetet e Bashkuara, prodhuesit amerikanë kanë hequr dorë nga shitja e automjeteve në Japoni, pavarësisht se është tregu i tretë më i madh në botë.
Presidenti Donald Trump dhe Këshilli i Politikave Automobilistike që përbëhet nga General Motors, Ford dhe Fiat, e kanë quajtur të padrejtë. Megjithatë, mbikëqyrësit e industrisë theksojnë kontrastin e madh me karakteristikat unike të tregut japonez të makinave.
Firmat amerikane nuk prodhojnë makina që i përshtaten japonezëve, amerikanët nuk kanë investuar për një prezencë të fortë në vend dhe shumë konsumatorë japonezë mendojnë se makinat amerikane janë të paqëndrueshme dhe joefiçente. Thuajse 40% e makinave të shitura në Japoni i përkasin një kategorie të veçantë ekstra të vogël, që shiten kryesisht nga marka japoneze si Suzuki dhe Daihatsu. Japonia është e mbipopulluar dhe shoferët preferojnë makinat e vogla që manovrohen lehtë nëpër rrugë dhe përputhen me hapësirat e ngushta të parkingut. Sipas Qendrës për Hulumtime Automobilistike në Michigan, nuk mund të shiten makina që prodhohen për konsumatorin e Amerikës së Veriut në Japoni.
Mbi 95% e makinave në rrugët e Japonisë janë prodhim vendas dhe pjesa e mbetur mbushet nga makinat sportive europiane. Mercedez, BMW dhe Volkswagen, shesin dhjetëra mijëra makina në Japoni çdo vit. Ford doli plotësisht nga Japonia në vitin 2017, ndërsa General Motors ka shitur vetëm 700 makina në vitin 2018. Sipas analistëve vetëm marka Jeep e Fiat Chrysler ka popullaritet dhe është ndër makinat e pakta që shihet në Japoni.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.