Astrazeneca, edhe te të moshuarit – Nis shpërndarja e vaksinës, Manastirliu: Do përdoret në moshat mbi 80 vjeç dhe mësuesit

Vaksina anticovid e AstraZeneca do të përdoret për vaksinimin e të moshuarve mbi 80 vjeç, si dhe për mësuesit”. Gjithçka është bërë me dije nga ministrja e Shëndetësisë dhe Mbrojtjes Sociale, Ogerta Manastirliu, e cila ndoqi nga afër procesin e vaksinimin në Stadiumin ‘Air Albania’, ku morën dozën e dytë 80 të moshuarit që u vaksinuan të parët.

“Me dozat e AstraZeneca do të shtrihemi edhe tek moshuarit mbi 80 vjeç, si kategori prioritare. Do të jetë edhe AstraZeneca që do të të përdoret për vaksinimin e kësaj kategorie si edhe për mësuesit”, tha Manastirliu.

Manastirliu bëri me dije gjithashtu, se ka nisur shpërndarja e vaksinave për vaksinimin e mësuesve.

“Sot kemi filluar me shpërndarjen e vaksinave në të gjithë Njësitë Vendore të Kujdesit Shëndetësor, për të vijuar me vaksinimin e mësuesve.  Organizimi është me grup shkollash, për të mundësuar vaksinimin sa më të shpejtë në territor të mësuesve. Teksa në të gjitha strukturat të vaksinimit të përqërqendruar jemi duke vijuar me rivaksinimi e stafeve mjekësore dhe të moshuarve, tashmë nëpër shkolla do të vijojmë vaksinimin e mësuesve, duke siguruar edhe lehtësinë e vaksinimit në territor”

Që prej fillimit të vaksinimit janë kryer në total 24,887 doza të vaksinës. Sipas Ministrisë së Shëndetësisë janë vaksinuar 18,822 personel shëndetësor dhe staf mbështetës si dhe 5065 të moshuar dhe arsimtarë. Ndërkohë, në total kanë mbërritur 32 565 doza të vaksinës Pfizer, si dhe 38 400 doza të vaksinës Astra Zeneca, si pjesë e mekanizimit COVAX.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.