Athina vazhdon me masat e karantinës. Norma e pacientëve në kujdes intensiv në 90%. Rastet e reja, në rritje
Greqia nuk do të heqë masat e karantinës në Athinë në fund të muajit si ç’planifikohej, për shkak të rritjes së madhe të infeksioneve dhe mbi-kapaciteti të spitaleve. Zona metropolitane e Athinës, ku jeton gjysma e popullsisë greke, ka qenë në masa të ashpra të karantinës që pritej të skadonin në fund të muajit Shkurt. Megjithatë, Kryeministri grek Kyriakos Mitsotakis, tha në një takim në kabinet se rritja e madhe e rasteve do shtyjë planin për rihapje më datë 1 Mars. Ministri i Shëndetësisë, Vassilis Kikilias, tha se norma e pacientëve në njësitë e kujdesit intensiv në spitalet Covid në Atika, ka arritur në 90%.
“Athina ka në këtë periudhë ngarkesën më të madhe virale dhe pasojat po rëndojnë sistemin e shëndetit publik, me një nivel rekord të shtrimeve në spitale. Norma e pacientëve në njësitë e kujdesit intensiv në Atika është në 90%, me 235 shtretër të zënë, nga totali prej 262.”
Greqia, edhe pse ka regjistruar mbi 6,000 vdekje, i’a ka dalë më mirë se pjesa më e madhe e Europës në kontrollin e pandemisë dhe mbrojtjten e shërbimeve shëndetësore, të dërrmuara nga vite të krizës financiare. Megjithatë, spitalet shtetërore janë në mbikapacitet. Ekspertja e shëndetësisë, Anastasia Kotanidou, tha se sa më mirë t’i binden masave, aq më shpejtë do përfundojë karantina. Në 24 orët e fundit, autoritetet raportuan 1,913 raste të reja, me thuajse gjysmën e tyre në Atika, nga 1,000 – 1500 që ishte shifra në ditët e kaluara. Shkollat janë mbyllur dhe vetëm blerjet e nevojshme janë operuese në Athinë, ndërkohë që shtetrrethimi gjatë natës ndalon lëvizjen.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.