AT&T “mposht” Qeverinë – Fiton miratimin nga gjykata për të blerë Time Warner për $85 mld
AT&T ka fituar miratimin në gjykatë për të blerë Time Warner për 85 miliardë dollarë, duke hedhur poshtë përpjekjet e administratës së Donald Trump për të bllokuar marrëveshjen.
Kjo pritet të nisë gjithashtu një valë të shkrirjeve në korporata. Marrëveshja, që pritet të përfundohet në javën e ardhshme, është parë si një mundësi për industrinë mediatike që është gjendur përballë konkurrencës nga kompani si Netflix dhe Google, që prodhojnë përmbajtje dhe e shesin online në mënyrë direkte ndaj konsumatorëve, pa kërkuar një nënshkrim të kushtueshëm kabllor.
Ofruesit e shërbimeve kabllore, wireless dhe me satelitë, i shohin blerjet e kompanive që krijojnë përmbajtje si një mënyrë për të shtuar të ardhurat. Trump, që ka kritikuar shpesh përmbajtjet e CNN që zotërohet nga Time Warner, e ka kundërshtuar marrëveshjen kur u lajmërua në Tetor të 2016-ës.
Vendimi i gjykatës mund të nxisë gjithashtu një seri të kompanive të televizionit me pagesë që blejnë prodhues të filmave, me ofertën e Comcast për Twenty-First Century Fox që pritet të jetë e para.
Marrëveshja e AT&T, që përfshin borxhin, do të ishte e katërta më e madhe në industrinë globale të telekomunikacionit dhe medias dhe gjithashtu marrëveshja e 12 më e madhe e çdo sektori.
Sipas vendimit, qeveria kishte dështuar të tregonte dëmin që kjo do të shkaktojë në konkurrencë. Aksionet e AT&T ranë me 1.3% menjëherë pas vendimit, ndërsa Time Warner u rrit me 5%.
Duke vënë në dukje besimin e fituar nga kompanitë që kanë plane për shkrirje, aksionet e Twenty-First Century Fox u rritën me 7%, ndjekur nga rritje në të gjithë sektorin e telekomunikacionit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.