Audit të pavarur institucioneve – Çelet gara për inspektorë të jashtëm publikë, hetime kallzimeve për korrupsion
Ministria e Financave ka shpallur garën për përzgjedhjen e inspektorëve financiarë publikë të jashtëm, të cilëve ligji u jep tagrin të auditojnë njësitë e qeverisjes së përgjithshme; shoqëritë shtetërore, organizatat jofitimprurëse dhe autoritetet e përbashkëta që kontrollohen nga shteti si dhe çdo person fizik apo juridik, që përfiton fonde nga Buxheti i Shtetit, Bashkimi Europian apo fondet në bazë të një marrëveshjeje ndërkombëtare, ku përfitues është shteti shqiptar.
Afati i aplikimit të kandidatëve për t’u përzgjedhur në listën e inspektorëve financiarë publikë është 40 ditë nga 17 shtatori kur është shpallur urdhëri i Ministrisë së Financave.
Inspektimi financiar publik nis vetëm mbi bazën e kërkesës, informacionit apo ankesës. Burimet e kërkesës, informacionit apo ankesës janë: kërkesa nga Presidenti i Republikës; nga Kryeministri; nga Ministri i Financave; nga Kontrolli i Lartë i Shtetit; nga Prokurori i Përgjithshëm; si dhe nga titullarët dhe nëpunësit autorizues të njësive publike.
Por inspektorët e jashtëm mund të vihen në lëvizje edhe nga informacione për parregullsi nga auditimi i brendshëm; informacione të menaxhimit financiar dhe kontrollit; ankesa nga punonjës në sektorin publik apo privat; ankesa nga çdo person fizik/juridik; si dhe informacione apo ankesa nga persona anonimë, kur në to ekzistojnë elemente të keqmenaxhimit të rëndë financiar, mashtrimit, vjedhjes, shkatërrimit të pronës, shpërdorimit të detyrës apo korrupsionit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.