Auditimi i KLSH: “Ministria e Transportit të mos prokurojë pa siguruar paratë”
Kontrolli i Lartë i Shtetit i ka rekomanduar Ministrisë së Transportit dhe Infrastrukturës që të mos zhvillojë prokurime në rast se nuk ka siguruar më parë paratë e nevojshme. Në një auditim të përmbyllur së fundmi KLSH ka nënvizuar tre pika që kanë si burim situatën e borxheve të prapambetura të cilat deri në dhjetor 2016 rezultonin 4.1 miliardë lekë.
“Krijimi i detyrimeve të prapambetura nuk është shoqëruar me një analizë të shkaqeve të pagesave të vonuara. Nuk është respektuar disiplina buxhetore, kryesisht në drejtim të planifikimit buxhetor, kontrolleve financiare paraprake dhe rritjen e eficiencës së shpenzimeve nga ana e titullarëve, nëpunësve autorizues, nëpunësve zbatues. Nuk janë marrë masa paraprakisht për të siguruar financimin e mjaftueshëm për vitin ushtrimor përpara se të fillojë prokurimi, bazuar në disponibilitetin e fondeve buxhetore” vlerëson KLSH.
Për këtë arsye duket se janë renditur edhe katër rekomandimet ku së pari duhet të respektohet disiplina buxhetore e lidhur me planifikimin. Së dyti rekomandohet sigurimi i parave dhe më pas prokurimi.
Së treti Ministria e Financave duhet të monitorojë angazhimet nga Sistemi Informatikë Financiar i qeverisë dhe së katërti duhet që të analizohen arsyet që çojnë në akumulimin e detyrimeve të prapambetura.
Nertila Maho/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.