Australia hap dyert për të huajt që nga 1 Dhjetori – Të gjithë studentët dhe punëtorët e vaksinuar mund të futen në vend

Sipas parashikimeve të qeverisë australiane, rreth 200,000 studentë të huaj të vaksinuar dhe punëtorë të kualifikuar do të kthehen së shpejti në Australi, pa pasur nevojë të karantinohen.

Kjo është masa e radhës që shënon lehtësimin e mëtejshëm të kufizimeve të vendit ndaj pandemisë, javën e ardhshme.

Kryeministri Scott Morrison tha se që nga 1 dhjetori, studentët, punëtorët e kualifikuar dhe udhëtarët me pushime pune që janë vaksinuar do të mund të zbresin në aeroportet e Sidneit dhe Melburnit pa pasur nevojë të aplikojnë për përjashtime.

Morrison tha se pret që 200,000 studentë dhe punëtorë të kualifikuar të mbërrijnë deri në janar. Qytetarët e vaksinuar të Japonisë dhe Koresë së Jugut gjithashtu do të mund të hyjnë pa karantinë, si dhe personat me viza humanitare.

Por qeveria ende nuk ka vendosur se kur turistët e përgjithshëm do të mund të kthehen në vend.

Ndërkohë në Zelandën e Re baret, restorantet dhe palestrat mund të rihapen  nga fillimi i dhjetorit, por klientët do të duhet të vërtetojnë se janë vaksinuar plotësisht.

Njoftimi i qeverisë së Zelandës së Re heq mbetjet e fundit të një bllokade që filloi në qytetin më të madh të vendit në gusht. Ai gjithashtu sinjalizon një fazë të re në përgjigjen e Zelandës së Re ndaj pandemisë, ku njerëzit në të gjithë vendin do të duhet të vaksinohen plotësisht për të marrë pjesë në çdo gjë, nga prerja e flokëve deri te shikimi i një koncerti.

Kryeministrja Jacinda Ardern thotë se vendi do të hyjë në një sistem të ri pandemik “semaforik” bazuar në përdorimin e pasaportave të vaksinave duke filluar nga fundi i 2 dhjetorit.

E . S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.