Australia mban vlerësimin “AAA” – Një ndër 10 vendet që kanë këtë vlerësim nga të 3 agjencitë
Agjencia Standard & Poor’s ka konfirmuar vlerësimin prej AAA të Australisë, duke nënvizuar borxhin e ulët publik dhe elasticitetin e ekonomisë. Qeveria e Australisë premtoi se do të arrijë në suficit buxhetor deri në vitin 2020, duke përfunduar dekada të deficiteve publike që kanë kërcënuar kreditin më të lartë sovranë që ekziston. Moody’s dhe Fitch kanë mirëpritur planet ekonomikë të Qeverisë, duke thënë se buxheti nuk ka ndikim të madh te vlerësimet e këtyre.
Australia është një ndër 10 vendet në botë që kanë vlerësimin AAA të kreditit nga të 3 agjencitë kryesore. Megjithatë, Standard & Poor’s, e mbajti perspektivën negative. “Vonesa e reformave fiskale rrit shqetësimet mbi aftësinë e vendit për të arritur objektivat”, deklaron Agjencia.
Të dhënat e kësaj jave treguan se rritja e pagave është ngadalësuar në nivele rekord, ndërsa humori i konsumatorëve është përkeqësuar. Standard & Poor’s paralajmëroi për rreziqe edhe në tregun e shtëpive, kryesisht në Sydney dhe Melbourne, ku çmimet mesatare thuajse janë dyfishuar që prej 2009-ës.
Paralelisht, krediti i bankave drejt ekonomive familjare është rritur në një rekord të lartë prej 175% në raport me Produktin e Brendshëm Bruto. Standard & Poors pret që kjo normë të rritet në 188% deri në 2020-ën. “Një rritje kaq e shpejtë e kreditit mund të sjellë cenueshmëri drejt stabilitetit financiar, fiskal dhe ekonomik, nëse ndodh ndonjë ndërprerje e menjëhershme”, thekson Agjencia.
Ekonomia prej 1.7 trilionë euro e Australisë, një vend eksportues i lëndëve të para, ka përfituar nga çmimet më të larta të hekurit. Ekonomia është rritur me 2.4% në 2016-ën, duke sjellë 101 tremujorë radhazi pa tkurrje.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.