Australia rikthen masat e karantinës / Një vatër e re me 9 raste në Melburn pas 3 muajve me zero infeksione

Qyteti i dytë më i madh i Australisë, Melburni, ka rivendosur masa të karantinës ndaj Covid-19, ndërkohë që autoritetet kanë hasur vështirësi të gjejnë origjinën e vatrës së re, duke bërë që Zelanda e re të ndalojë udhëtimet me shtetin e Viktorias.  Prej shqetësimeve se vatra, që është rritur në 9 raste në 2 ditë, mund të shkaktojnë një përhapje të madhe, Viktoria vendosi masa të kufizimit social dhe bëri maskat të detyrueshme në hotele, restorante dhe qendra të tjera të brendshme deri më 4 Qershor. Kjo vatër i jep fund 3 muajve me zero raste të Viktorias dhe Zelanda e Re pezulloi udhëtimin pa karantinë me shtetin.  Australia ka shmangur shifra të larta të covid-19 që janë parë në vendet e zhvilluara, duke mbyllur kufijtë ndërkombëtarë në fazat e hershme të pandemisë.   Vendi ka raportuar vetëm 30,000 raste dhe 910 vdekje.   Mijëra njerëzve në Melburn i është dhënë urdhër të vetë-izolohen dhe bëjnë teste të Covid-19.  Një nga rastet kishte një dozë të lartë virale kur vizitoi disa ambiente, duke bërë që autoritetet të paralajmërojnë 5 milionë banorët e Melburnit që të presin shumë  raste pozitive në ditët  e ardhshme. Autoritetet i bënë thirrje banorëve të shtetit që të vaksinohen. “Janë miliona banorë të përshtatshëm për vaksinim. Ata nuk duhet të presin për të nesërmen”- tha James Merlino, lideri i shtetit. Viktoria është ndër shtetet më të goditura gjatë valës së dytë në vitin e kaluar, me rreth 70% të totalit të rasteve dhe 90% të vdekjeve në Australi.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.