Austria ka humbur peshë në Shqipëri – Raporti i Institutit të Vienës: Norma e IHD përmbi stokun, thuajse përgjysmuar

Investimet e Huaja Direkte të Austrisë në vendin tonë fiksohen në 447  milionë euro, thotë Instituti i Vjenës për Studime Ekonomike Ndërkombëtare në raportin më të fundit për vendet e Europës qendrore dhe juglindore, 23 në total.

Të dhënat i referohen vitit 2017 dhe tregojnë se, Shqipëria është vendi i 7-të në rajon për peshën e investimeve të huaja direkte austriake mbi totalin.  Në vitin 2012 ndërkohë zinte vendin e 4-ët, por me një nivel më të ulët të investimeve, në 387 milionë euro. Renditja bëhet pikërisht në bazë të peshës që zë Austria si vend origjine i investimeve të huaja direkte. Në 2017-ën pasha vlerësohej në 6.9%, ndërsa në 2012 vlerësohej në 11.9%.

Pra, pavarësisht se është rritur ndjeshëm volume i investimeve austriake në vend, ky hap i rritjes është më i ngadaltë se ai i rritjes së investimeve nga vendet e tjera, duke bërë që pesha totale e investimeve nga Austria përmbi stokun total të bjerë ndjeshëm gjatë këtyre viteve të fundit, e për rrjedhojë Shqipëria të humbasë peshë në rajon. Pavarësisht rënies, norma prej 6.9% mbetet mbi mesataren e rajonit, që fiksohet në 5.1%.

Në raport, Instituti i Vjenës për Studime Ekonomike ndërkombëtare vlerëson se, vëllimi i IHD në rajonin e Europës qendrore dhe juglindore do të bjerë gjatë këtij viti.  E njëjta gjë vlen edhe për investimet austriake në rajon. Por, në raport thuhet gjithashtu se, investimet austriake vijojnë të gëzojnë norma mjaft të larta fitimi.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.