Autostrada Tiranë-Durrës/Punimet, ARRSH: Skema e devijimit të trafikut për automjetet
Në kuadër të projektit të mirëmbajtjes të Bankës Botërore, të hënën rinisin punimet për riparimin e shtresave asfaltike në autostradën Tiranë-Durrës. Sipas Autoritetit Rrugor Shqiptar, punimet do të zhvillohen në segmentin Maminas-Sukth në drejtimin Tiranë-Durrës e për pasojë qarkullimi për automjetet nuk do të lejohet.
Për këtë arsye ARRSH dhe Policia e Qarkullimit Rrugor kanë hartuar një plan operacional të ndërhyrjes dhe devijimit të trafikut për të shmangur bllokimin e qarkullimit dhe garantuar mbarëvajtjen e punës në terren. Referuar kësaj skeme, trafiku devijohet në kryqëzimin e Maminasit në drejtim të rrugës dytësore.
Ndërkohë që, automjetet që udhëtojnë nga Tirana në drejtim të Durrësit duhet të futen në nënkalimin e Maminasit ( Lalezit), të vazhdojnë në rrugën dytësore deri ne kryqëzimin e Sukthit dhe më pas mund të dalin përsëri në autostradë ose të vazhdojnë në rrugën dytësore. Gjithashtu, ARRSH këshillon mjetet e transportit të rëndë që udhëtojnë nga Fushë Kruja në drejtim të Durrësit të kthehen në rrugën dytësore në Vorë, duke përdorur nënkalimin e rrugës së re.
Ky devijim do të vazhdojë deri ditën e enjte, ndërkohë që pas përfundimit të ndërhyrjes në segmentin Maminas – Sukth do të fillojë ndërhyrja në segmentet e tjera për të cilat ARRSH dhe Policia e Qarkullimit Rrugor do të përditësojnë skemat e lëvizjes. Sipas Ministrit të Infrastrukturës dhe Energjisë, riparimi i shtresave asfaltike do të përfundojë tërësisht në fund të muajit qershor.
DEVIJIMI I TRAFIKUT NË AUTOSTRADËNTIRANË-DURRËS
Bllokimi/Devijimi i trafikut fillon në orën 06:00 të ditës së hënë, datë 18/06/2018.
Trafiku në drejtim Tiranë-Durrës devijohet në kryqëzimin e Maminasit në drejtim të rrugës dytësore.
Automjetet që udhëtojnë nga Tirana në drejtim të Durrësit duhet të futen në nënkalimin e Maminasit ( Lalëzit) dhe të vazhdojnë në rrugën dytësore deri në kryqëzimin e Sukthit. Në vazhdim mund të dalin përsëri në autostradë ose të vazhdojnë në rrugën dytësore.
Mjetet e transportit të rëndë që udhëtojnë nga Fushë Kruja në drejtim të Durrësit të kthehen në rrugën dytësore në Vore, duke përdorur nënkalimin e rrugës së re.
Ky devijim do të vazhdojë deri ditën e enjte, datë 21/06/2018.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.