Avancim i reformave, Fleckenstein takon Metën, Ruçin e Bashën

Raportuesi për Shqipërinë në Parlamentin Europian Knut Fleckenstein i shoqëruar dhe nga Ambasadorja e BE-së në vendin tonë Romana Vlahutin, zhvilloi një takim në Presidencë me Kreun e Shtetit Ilir Meta, takimi i parë ky mes tyre që kur Meta mori detyrën e Presidencës.

Zyra për shtyp e Presidentit bën me dije se gjatë takimit me Fleckenstein, Meta ka vënë theksin tek avancimi i reformave për integrimin përmes një konsensusi sa më të gjerë pozitë-opozitë.

“Avancimi i reformave gjithëpërfshirëse dhe me konsensus sa më të gjerë mes pozitës dhe opozitës, me qëllim integrimin e Shqipërisë në Bashkimin Europian dhe mundësimi i një klime politike mirëbesimi dhe bashkëveprimi të ngushtë është shumë i rëndësishëm në këtë proces” është shprehur Presidenti Meta.

Presidenti i Republikës  nënvizoi se një rëndësi madhore ka zbatimi i Reformës në Drejtësi, në veçanti ecuria e procesit të Vettingut, me synim krijimin sa më të shpejtë të institucioneve të reja të drejtësisë.

Pas takimit në Presidencë, eurodeputeti iu drejtua Kuvendit, ku zhvilloi një takim me kryeparlamentarin e ri Gramoz Ruçi. Ndërkohë Knut Fleckenstein zhvilloi një takim edhe me kreun e PD, Lulzim Basha.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.