Avancojnë punimet në aeroportin e Kukësit – Balluku: Pas 4 muajsh nisim fluturimet, do të punësohen 200 persona

Punimet për ndërtimin e aeroportit të Kukësit po ecin sipas parashikimeve, duke synuar që pas 4 muajsh të nisin fluturimet. Ministrja e Infrastrukturës dhe Energjisë, Belinda Balluku ka inspektuar punimet në këtë vepër të rëndësishme aeroportuale, që do të rrëzojë monopolin e aeroportit të Rinasit, duke synuar dhe tarifa më të ulëta për biletat ajrore.

Pista e aeroporti të Kukësit do të zgjatet me 300 m, duke arritur një gjatësi prej 2.2 km, ndërkohë që me nisjen e operimeve ajrore parashikohet edhe punësimi i 200 punonjësve.

Paralelisht, sipas Ballukut janë  marrë të gjitha masat për të për t’i ofruar këtij aeroporti të gjithë infrastrukturën e nevojshme.

Për ndërtimin e Aeroportit të Kukësit po punojnë njëkohësisht disa kompani, krahas atyre shqiptare edhe kompania holandeze NACO, një ndër kompanitë më të njohura në botë në fushën e aviacionit civil. Terminal ii ri i pasagjerëve, i cili është duke u ndërtuar, do të jetë me dy kate, ku do të jenë të stacionuar edhe zyrat shtetërore. Ndërkohë që, për këtë aeroport do të përdoret një teknologji satelitore e siguruar nga Shërbimi Europian i Navigimit nëpërmjet satelitit.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.