Avantazhi i mbylljes në shtëpi / Mund të shpëtojë edhe më shumë jetë duke parandaluar ndotjen mjedisore
Bllokimi global i shkaktuar nga koronavirusi, ka mbyllur fabrikat dhe ka zvogëluar udhëtimet, duke ulur kështu ndotjen vdekjeprurëse dhe ngrohjen globale.
Ky bllokim mund të shpëtojë më shumë jetë nga ulja e ndotjes sesa nga vetë virusi, tha François Gemenne, drejtori i Observatorit Hugo, i cili studion ndërveprimet midis ndryshimeve mjedisore, migracionit njerëzor dhe politikës.
“Çuditërisht, mendoj se numri i vdekjeve të koronavirusit në fund të ditës do të jetë më i vogël, krahasuar me vdekjet nga ndotja atmosferike,” tha Gemenne, duke përmendur, për shembull, 48,000 njerëz që vdesin çdo vit në Francë për shkak të ndotjes atmosferike dhe më shumë se një milion në Kinë.
Shkencëtarët vlerësojnë se numri i vdekjeve në SHBA nga ndotja e ajrit arrin në më shumë se 100,000 në vit, dhe Organizata Botërore e Shëndetit vlerëson se numri global është 7 milion..
Reduktimet në ndotjen e ajrit dhe ngrohja globale mund të shpëtojnë më shumë jetë.
“Me shumë gjasa, numri i njerëzve që do t’u shpëtohet jeta për shkak të pastërtisë së ajrit është më i madh sesa numri i njerëzve që do të vrasë ky virus” tha Gemenne në një paraqitje për France 24.
“Ajo që më surprizon më shumë është se, masat që ne jemi të gatshëm të ndërmarrim për të përballuar këtë koronavirus janë shumë më të rënda sesa masat që do të ishim të gatshëm të ndërmerrnin për të përballuar ndryshimin e klimës ose ndotjen atmosferike.”, tha Gemenne.
“Unë mendoj se kjo periudhë duhet të shërbejë që ne të reflektojmë, pse kemi më shumë frikë nga koronavirusi sesa nga ndryshimet klimatike që vrasin më shumë njerëz.”, ka përfunduar ai.
Dosti Banushi – SCAN
Burimi: Forbes
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.