Avionë të NATO-s në Shqipëri, Xhaçka: Nis zyrtarisht projekti për ndërtimin e Bazës së Kuçovës

Qielli i Tiranës është përshkuar këtë të mërkurë nga disa vizitorë të pazakontë. 5 avionë të NATO-s kanë kryer një fluturim demonstrativ, pak minuta përpara ceremonia së pritjes se Komandantit te Forcës Ajrore te NATO, gjeneral Tod Wolters ne ambientet e Ministrisë se Mbrojtjes.

Pak pas demonstrimit, Ministrja Olta Xhaçka dhe Gjenerali Wolters shpallën nisjen zyrtare të projektit për ngritjen e Bazës së NATO-s në Kuçovë. “Për të konfirmuar seriozitetin e qeverisë shqiptare në këtë projekt, Ministria e Mbrojtjes ka autorizuar Agjencinë e NATO-s për Prokurorimet dhe Mbështetjen – NSPA, për hartimin e masterplanit për bazën e Kuçovës sipas standardeve të kërkuara nga aleanca.

Ky masterplan i hartuar nga Agjencia e specializuar e NATO-s do të jetë gati brenda pak muajsh, duke i hapur rrugë fillimit sa më shpejt punimeve në terren që sipas afateve të parashikuara mund të jetë dhe në krye të këtij viti.

Demonstrimi që pamë sot nga disa nga komponentët ajrorë të NATO-s, i pari në vendin tonë, tregon qartazi fuqinë teknologjike më bashkëkohore të Aleancës në shërbim të mbrojtjes kolektive, të vlerave dhe parimeve të saj”. 

Gjenerali Tod Wolters tha se NATO do të vijojë thellimin e bashkëpunimit me Shqipërinë. Baza ajrore e Kuçovës do të shndërrohet në bazën e parë të NATO-s në Ballkanin Perëndimor. Vetëm investimi fillestar është në shifrat e 50 milionë eurove.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.