Avokati i Tatimpaguesve, hyn në fuqi udhëzimi – DPT: Hapat që duhet të ndiqni për të përfituar shërbimet pa pagesë
Është publikuar në Fletoren Zyrtare udhëzimi i ri për funksionimin e avokatit të tatimpaguesve. Drejtoria e Përgjithshme e Tatimeve ka në kuadër të informimit të këtyre të fundit, ka publikuar edhe të gjitha informacionet e nevojshme që përmban ky udhëzim.
Ky i fundit përfshin funksionet, përgjegjësitë si dhe procedurat që duhet të ndjekin për të përfituar mbrojtjen e të drejtave të tyre nga Avokati i Tatimpaguesve. Po ashtu, ndër të tjera, udhëzimi përcakton edhe rregullat dhe procedurat që duhet të ndjekin tatimpaguesit si dhe Avokati i Tatimpaguesve, si strukturë e pavarur në vendimmarrje në përbërje të Ministrisë së Ekonomisë dhe financave.
Sa i takon hapave që duhet të ndjekin tatimpaguesit për shqyrtimin e çështjeve nga Avokati i Tatimpaguesve, sipas DPT-së ato përfshijnë:
- Çdo tatimpagues, grup tatimpaguesish, shoqata apo institucione që mbrojnë interesat e tatimpaguesve, pretendojnë për shkelje të të drejtave dhe të interesave të ligjshme, qofshin këto individuale apo të përbashkëta të tatimpaguesit apo tatimpaguesve, me veprime të paligjshme apo të parregullta të administratës tatimore qendrore ose me mosveprime të saj, kanë të drejtë të ankohen ose të njoftojnë Avokatin e Tatimpaguesve dhe të kërkojnë ndërhyrjen e tij për rregullimin e situatës, në lidhje me një të drejtë të shkelur apo të mohuar.
- Për ankesat, kërkesat dhe njoftimet drejtuar Avokatit të Tatimpaguesit nuk kërkohet ndonjë formë apo format i caktuar. Ato duhet të shprehin qartë objektin e ankimit ose të kërkesës. Nëse disponohen, dokumente, fakte dhe prova, të cilat mendohet se mbështesin objektin e ankimimit, ato duhet t’i bashkëngjiten ankesës së drejtuar Avokatit të Tatimpaguesve.
- E drejta për t’u ankuar tek Avokati i Tatimpaguesve lind vetëm pasi të jetë konsumuar një herë me shkrim e drejta për t’u ankuar te drejtoria rajonale përkatëse apo drejtoritë funksionale brenda Drejtorisë së Përgjithshme të Tatimeve, të cilat kanë nën juridiksion shqyrtimin/administrimin e procedurës së kontestuar nga ankimuesi.
- Avokati i Tatimpaguesve duhet të ruajë konfidencialitetin për informacionin e dhënë nga ankimuesi, duke mos e paraqitur atë të plotë te drejtoria rajonale me të cilën lidhet ankimimi, për sa e gjykon të arsyeshme, si dhe nëse kjo kërkohet nga personi që bën ankesën, kërkesën apo njoftimin.
- Administrimi i kërkesave, njoftimeve apo ankesave të mbërritura tek Avokati i Tatimpaguesve bëhet nëpërmjet një programi kompjuterik, i cili në çdo kohë mund të japë informacion në lidhje me ankuesin, objektin e ankimit, ecurinë e trajtimit nga Avokati i Tatimpaguesve, që nga marrja në shqyrtim e deri te mbyllja e çështjes me shënimet përkatëse të arsyeve dhe rezultateve të mbylljes.
- Në asnjë rast ankimi, kërkesa apo njoftimi i depozituar pranë Avokatit të Tatimpaguesit nuk e pezullon procedurën e shqyrtimit nga ana e drejtorive rajonale apo drejtorive funksionale të Drejtorisë së Përgjithshme të Tatimeve, për çështjet që janë objekt i ankimit, kërkesës apo njoftimit dhe as procedurën e ekzekutimit të akteve që kanë dalë nga administrata tatimore për ato çështje.
Administrata Tatimore thekson ndër të tjera se çdo shërbim që ofrohet nga Avokati i Tatimpaguesve për këto të fundit është pa pagesë.
Ndërkohë, thekson ndër të tjerë që ai nuk është i autorizuar:
- të hetojë apo të ndërhyjë në rastet, për të cilat tatimpaguesi është hetuar nga Drejtoria e Hetimit Tatimor apo nga Drejtoria e Investigimit të Brendshëm.
- të investigojë apo të ndërhyjë në procesin e përcaktimit të detyrimit tatimor apo për raste, të cilat janë në proces
Po ashtu, Avokati i Tatimpaguesve nuk është hallkë e rishikimit administrativ tatimor dhe as nuk e zëvendëson atë. Ndërkohë, sipas DPT-së, kontaktimi i Avokatit të Tatimpaguesit për asistencë, nuk e pezullon afatin kohor, brenda të cilit mund të paraqitet një apelim.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.