Ballkani bëhet një – Greqia, Kroacia, Bullgaria e Rumania dakordësohen të na ndihmojnë
Ministrat e Jashtëm të 4 vendeve të Ballkanit, anëtare të Bashkimit Europian; Greqia, Bullgaria, Kroacia dhe Rumania janë takuar gjatë punimeve të Asamblesë së Përgjithshme të Organizatës së Kombeve të Bashkuara dhe kanë diskutuar pikërisht për integrimin e pjesës tjetër të Ballkanit në union.
Duket se përpjekjet e Bullgarisë nuk kanë qenë të kota dhe lobimi për Shqipërinë dhe 5 vendet e tjera të rajonit ka qenë i frytshëm. Ministrat e Jashtëm kanë rënë kështu dakord që të ndihmojnë 6 vendet e Ballkanit Perëndimor për të përshpejtuar procesin e anëtarësimit në union.
Për këtë arsye të katërt kanë vendosur që të vizitojnë së bashku Tiranën dhe Maqedoninë, brenda fundit të këtij viti, për të diskutuar mënyrat sesi mund të ndihmojnë këto vende, tashmë me eksperiencë në Bashkimin Europian.
Një gjë të tillë e ka bërë të ditur vetë Ministria e Jashtme e Greqisë nëpërmjet një komunikate për shtyp. Interesi i përbashkët i këtyre katër shteteve për të stabilizuar rajonin duket se do të jetë një ndihmesë e madhe për Shqipërinë dhe 5 vendet e tjera të Ballkanit Perëndimor që aspirojnë për t`u bërë pjesë e unionit.
Gjatë punimeve të asamblesë së OKB-së ndërkohë Nikos Kotzias është takuar edhe me ministrin e Europës dhe punëve të jashtme të Shqipërisë, Ditmir Bushati.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.